image-ads_2000x150
image-elizamin-isgenderovbackend

Düşmənin qorxulu röyası olan, “Dayı” ləqəbli şəhid kəşfiyyatçı: Əlizamin İsgəndərovun HƏYAT YOLU

image-ads_728x90

Bu gün hər kəsin dayı kimi tanıdığı, əsgərləri öz balası kimi sevən şəhidimiz İskəndərov Əlizaminin anım günüdür.

Şəhid İskəndərov Əlizamin Həmid oğlu 1977-ci il dekabr ayının 6-da Beyləqan rayonunun Milabad qəsəbəsində dünyaya gəlib. O, 1984-cü ildə Milabad kənd tam orta məktəbin 1-ci sinfinə daxil olub, 1995-ci ildə həmin məktəbin 11-ci sinfini bitirib. Əlizamin uşaqlıqdan idmanla məşğul olmuş, öz fiziki hazırlığı ilə seçilmişdir. 1996-cı ilin yanvar ayında Beyləqan rayon hərbi komissarlığı tərəfindən həqiqi hərbi xidmətə çağrılan Əlizamin Silahlı Qüvvələrin Bakı şəhərində yerləşən “N” saylı hərbi hissəsində xidmət edib. Xidməti ərzində keçmiş müdafiə naziri Səfər Əbiyevin şəxsi mühafizəçisi olaraq qulluq etmiş, 1999-cu ildə tərxis olunmuşdur.

O, hərbi xidmətini müvəffəqiyyətlə başa vurduqdan sonra doğma kəndinə qayıdıb və yenidən idmanla məşğul olub. Bir neçə dəfə ölkə üzrə yarışlarda nailiyyətlər əldə etməsinə baxmayaraq, Əlizaminin hərbi sahəyə marağı onu yenidən bu çətin və məsuliyyətli işə qaytarıb. O, 2006-cı ildə sənədlərini Silahlı Qüvvələrin “Müddətdən artıq həqiqi hərbi xidmət hərbi qulluqçularının hazırlığı” kursuna verib. Kursu uğurla bitirdikdən sonra Beyləqan rayonunda yerləşən “N” saylı hərbi hissənin rabitə bölüyündə xidmətə başlayıb. Peşəsinin sirlərinə dərindən yiyələnən Əlizamin təlimlərdə həmişə uğur qazanıb, rabitəçi kimi adından söz etdirməyi bacarıb.
2009-cu ildən isə “N” saylı hərbi hissənin kəşfiyyat taboruna təyinat alıb və xidmətini kəşfiyyatçı kimi davam edib. Fəaliyyəti zamanı vəzifə borclarını layiqincə yerinə yetirib, komandirlərinin və xidmət yoldaşlarının eləcə də əsgərlərin hörmətini qazanıb. Xidməti ərzində bir çox döyüş tapşırıqlarının öhdəsindən uğurla gəlib dəfələrlə düşmən nəzarətində olan ərazilərə keçib, lazımi məlumatları toplamış və geri qayıdıb. 2017-ci il fevralın 24-dən 25-nə keçən gecə düşmən 2016-cı ilin aprelində itirdiyi mövqeləri geri qaytarmaq üçün Silahlı Qüvvələrimizin nəzarətində olan ərazilərə hücuma keçib.

Hədəf böyük strateji əhəmiyyət daşıyan Xocavənd rayonu istiqamətində yerləşən Nərgiztəpə idi. Lakin əməliyyat şəraitinə uyğun olaraq düşmənin atəş mövqelərinə və cəmləşmə nöqtələrinə qarşı müvafiq cavab tədbirləri həyata keçirilmişdir. Əlizamin tariximizə fevral döyüşləri kimi düşən həmin əməliyyatlarda böyük şücaət göstərmiş, neytral zonada qalan döyüş yoldaşlarını xilas etmişdir.

O, 2020-ci il sentyabrın 27-si səhər saatlarında Ermənistanın atəşkəs rejimini pozub Azərbaycana qarşı hücum etməsi və ordumuzun əks-hücuma keçməsi ilə başlayan Vətən müharibəsində də igidliyi ilə özünü təsdiq edib. Peşəkar kəşfiyyatçı həm də ona verilən hədəfləri dəqiqliklə vurmağı ilə seçilirdi. Elə bu bacarıqlarına görə o, düşmənin xeyli sayda canlı qüvvəsini məhv edib. Oktyabrın əvvəlində yaralanıb, hərbi hospitalda ağrıkəsici qəbulundan sonra neytralda qalan şəhid əsgərlərini çıxarmalı olduğunu deyərək təkrar döyüşə qayıdıb.
Füzuli və Qubadlı rayonları, Hadrut qəsəbəsi, eləcə də Tuğ kəndi uğrunda gedən döyüşlərdə cəsarətlə vuruşan Əlizamin oktyabrın 17-də ikinci dəfə yaralanıb. Hospitalda bir neçə gün müalicə aldıqdan sonra, sağalmasa da, yenidən döyüşlərə qatılmaq istəyir. Lakin həkimlər və ailə üzvləri müalicəsinə davam etməsi üçün təkid edir, bu zaman o :”Mənim 1 Abbasım (oğlum) evdədirsə, 36 Abbasım da oradadır. Siz olsanız mənim yerimdə, hansını seçərsiniz?”,-deyir və yenidən döyüşə qayıdır. 3-cü dəfə minamyot mərmisinin zərbəsindən qayaya çırpılaraq yaralandıqda isə həkimlər 1 həftə müalicə almasını məsləhət görsə də, döyüşə yollanmışdır. Lakin noyabr ayının 4-də Daşaltı kəndində yenidən yaralanmışdır. Ayağını jqutla bağlayıb özü-özünə morfin vuraraq döyüşə davam etsə də, qan itirmədən şəhid olmuşdur. Əlizamin noyabrın 5-də Milabad qəsəbəsində uğrunda canını fəda etdiyi vətən torpağına tapşırılıb.

Əlizamin evli idi, onun dörd uşağı var. Qızları Həqiqət və Mələkxanım tələbədirlər. Böyük oğlu Abbas məktəblidir. Atasının ən çox sevdiyi kiçik oğlu Əlsəidin isə 4 yaşı var.

Zəfər tariximizi yazan şəhidlərimizdən biri çavuş İskəndərov Əlizamin Həmid oğlu ölümündən sonra iştirak etdiyi döyüş əməliyyatlarında və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin sərəncamı ilə “Vətən uğrunda” medalı ilə təltif edilib.

Ramil Hikmət

Loading...
image-ads_728x90

  • whatsapp
  • messenger
  • telegram
  • vkontakte
  • odnoklassniki