“Qarabağda yaşayan mülki ermənilərə silah paylanılması bir daha onu nümayiş etdirir ki, Rusiya sülhməramlıları kontingenti üzərinə götürdüyü vəzifə və öhdəlikləri yerinə yetirmir”.
Bu fikirləri Herbiand.az-a Qarabağda erməni mülki əhalisinə silah paylanılması videosunu və Qarabağda ermənilərin təhlükəsizlik xidməti tərkibində yeni hərbi birləşmə yaradılmasını şərh edən hərbi ekspert Ədalət Verdiyev bildirib.
Ədalət Verdiyev hesab edir ki, Ermənistan rəhbərliyi birgə bəyanatada üzərinə götürdüyü tələbləri nəinki, yerinə yetirmir, hətta kobud şəkildə pozmaqla Azərbaycanı növbəti dəmir yumruğu vurmağa təhrik edir:
“Görünür ki, Ermənistanda və onu himayə edən dairələrdə nə Vətən müharibəsindən, nə noyabrın 16-da baş verənlərdən, nə də 24-25 martda Fərrux istiqamətində həyata keçirilən fəaliyyətlərdən bəziləri doğru-dürüst nəticə çıxarmayıb. Xatırladım ki, Azərbaycan Prezidenti dəfələrlə xəbərdarlıq edib ki, əgər bizə qarşı hər hansı bir istiqamətdən təhdid törədilərsə, həmin təhdidlər zərərsizləşdiriləcək. Odur ki, hər iki tərəf bu bəyanatdan özləri üçün doğru nəticə çıxarmalıdır. Belə davam etsə Azərbaycan əsgəri öz sözünü deməyə başlayacaq. Bu isə Ermənistan üçün çox ağırlı-acılı nəticəyə gətirib çıxaracaq”.
