Azərbaycanlı qadın MMA döyüşçüsü Tünzalə İmanlı Türkiyənin “Kanal 12” kanalına müsahibə verib.
Alp.Az xəbər verir ki, o, atası kimi döyüşçü olub Azərbaycanı qürurla təmsil etdiyini deyib:
“15 il bundan öncə qol güləşi ilə məşğul olmuşam. 8 ay idmana fasilə verdikdən sonra Bakıdakı dostlarımdan döyüşlərdə iştirak etmək təklifi gəldi. Bu idman növünü bəyəndim və davam etmək qərarına gəldim. Etiraf edim ki, 8 ay fasilə zamanı pis döyülmüşəm. Ondan sonra qərara gəldim ki, daha güclü olmalıyam və heç kəsin məni döyməsinə imkan verməməliyəm.
4 ildir peşəkar döyüşçüyəm. Rusiya Federasiyasında yaşayıram. Bu ölkənin vətəndaşı olmağıma baxmayaraq Azərbaycanı təmsil edirəm. Mənə bu barədə bir neçə dəfə sual verilib, hər dəfəsində qeyd etmişəm ki, mənim vətənim Azərbaycandır və bu ölkəni təmsil edəcəm.
Atam da mənim kimi idmançı olaraq Azərbaycanı təmsil edib.
Döyüşçü olduğuma görə ailəmdə heç bir problem yoxdur. Anam, atam, bacım və qardaşım mənə dəstək olur. Döyüşlər öncəsi atam mənə motivasiya xarakterli sözlər deyərək qələbəyə kökləyir.
Bu yolda böyük çətinliklər çəkmişəm. Elə günlər olub ki, cibimdə cəmi 60 qəpik pul qalıb. İki məşqə getməli idim. Ya su alıb məşqin birini buraxmalı idim, ya da məşqlərə susuz getməli idim. Məşqə getməyə üstünlük verirdim.
Kirayə mənzil tuturdum. Son pullarım mənzilin ödənişinə gedirdi. Ərzaq almağa pulum çatmırdı. Gecələr gəlib dolabı açırdım, boş olduğunu görüb qayıdıb yatırdım.
Deməyim odur ki, belə günlərimiz də olub. Amma bugünkü günümüzə çox şükür ki, hər şey qaydasındadır. Hər gün çətin günlərimi yada salıram və kim olduğumu unutmuram. Bu dünyaya qadın kimi gəlmişəm. Həyatdır, lazım olanda özümüzü kişi kimi də aparmalıyıq. Amma birinci növbədə xanımıq və bunu itirmək lazım deyil.
