“Heç vaxt “maço” kişi ilə yaşamaram”
“İşimin başqa ölkələrə də gedib çatdığını bilmək mənim üçün şərəfdir”
“İlk dəfədir ki, sizin ölkənizdən bir jurnalistə müsahibə verirəm”
“Doğum evində biz analar eyni şeyi hiss edirik”
“Analıq məzuniyyətimi bitirən kimi həmin serialın çəkilişinə qayıtmalı oldum”
Adriana Esteves – Braziliyalı məşhur aktrisa. İki dəfə “Ən Yaxşı Aktrisa” nominasiyasında Beynəlxalq Emmy Mükafatına namizəd göstərilib.
Azərbaycan televizaya tamaşaçıları onu daha çox “Katarina Batista” kimi tanıyıblar. İllər öncə internet, sosial medianın həyatımıza qədəm qoymadığı zamanlarda Azərbaycanda da Braziliya teleserialları nümayiş etdirilirdi. İnsanlar böyük maraq, sevgi ilə öz 45 dəqiqələrini həmin seriallara sərf edirdilər və dərd-düşüncələrindən az da olsa uzaqlaşırdılar. Gənclər bəzən həmin serialların baş qəhrəmanlarının həyat tərzlərini, rəftar və geyimlərini özlərinə örnək götürürdülər. Belə seriallardan biri də məşhur “Tikan və qızılgül” (O Cravo e a Rosa) telenovellasıdır. Tamaşaçılarının üzünə xoş təbəssüm bəxş edən “Tikan və qızılgül”ü Azərbaycanda ən reytinqli Braziliya teleseriallarından hesab etmək olar.
Növbəti müsahibimiz məşhur Braziliya teleserialı “Tikan və qızılgül”ün (O Cravo e a Rosa) “Katarina Batista”sı, yəni aktrisa Adriana Estevesdir. Kino, teleserial, teatr sahəsində bir çox uğurlara imza atan, canlandırdığı obrazıları ilə bütün dünyada tanınan braziliyalı aktrisa Adriana Esteves ilk dəfə olaraq Azərbaycan mətbuatına danışıb. Jurnalist Hafiz Əhmədovun suallarını cavablandıran aktrisa bir çox önəmli məqamlardan söhbət açıb, Azərbaycanla bağlı fikirlərini ifadə edib:
– Azərbaycanda sizi sevən insanlara özünüzü necə təqdim edərsiniz? Sizi daha yaxından tanımaq istəyirik.
-Üç övladım var. İki oğlan (Felipe və Vicente) və bir qız (Agnes). Artıq onlar böyüyüblər. 14, 21 və 23 yaşıları var. 17 ildir ki, aktyor Vladimir Briçta ilə evliyəm.
– Müsahibə üçün sizə Azərbaycandan yazdığımızı biləndə ilk fikiriniz necə oldu?
– Həqiqətən peşəkar və tutarlı bir karyeram var. 33 ildir ki, televiziya, teatr və kino sahəsində çalışıram. Bu işə 19 yaşımdan başlamışam. Bütün həyatım işimin ətrafında qurulub.
– Bu çətin anlarda sizi motivasiya edən nədir? Koronavirus sizə, film sənayesinə necə təsir edir?
-Hazırda koronavirusun yaratdığı bu faciəni və nəhəng ağrını yaşayırıq. Ölkəmizdəki pandemiya mədəniyyət sahəsində də ciddi problemlərə səbəb oldu. Bir çox insanın işsiz olduğunu görürük. Bu çox kədərlidir. Ümidimiz peyvənddir.
– Uğurunuzu nəyə borclusunuz? Ən böyük uğurunuz nədir?
-Mən sənətimi çox sevən bir aktrisayam. Və bütün həyatımı sənətimə həsr etmişəm. Ağır zəhmət və nizam-intizam əsasdır. Karyeram boyunca məni çox şərəfləndirən bəzi uğurlara imza atdım. Ən böyük uğurlarımdan biri “Av. Brasil” serialındakı “Carminha” obrazımdır. “Tikan və qızılgül” teleserialındakı “Katarina” obrazı da mənim üçün uğurdur.
– Planlarınız nədir? Sizi sevənlərə nə demək istərsiniz?
-Gələcək üçün planlarım çox çalışmaqdır. Daha çox kinoya çəkilmək və teatra qayıtmaq istəyirəm. İnsanlarla şəxsən görüşməkdən məmnun olardım. Və tamaşaçılarıma mənim işlərimi izlədikləri və bəyəndikləri üçün çoxlu təşəkkür etmək istəyirəm.
– “Tikan və qızılgül” (O Cravo e a Rosa) teleserialının uğur sirri nədir?
– “Tikan və qızılgül” iki braziliyalı rejissor tərəfindən çəkildi. Onlar Dennis Carvalho və Walter Avancini. Mətn Uilyam Şeksprin “Tamed Megera” əsərinə uyğunlaşdırılıb. Əsərin müəllifi Walcyr Carrascodur. Möhtəşəm idi. Braziliya dramaturgiyasındakı ən böyük adların yer aldığı gözəl bir heyətlə çalışdıq.
– “Tikan və qızılgül” teleserialında canlandırdığınız “Katarina Batista” rolu sizin həyatınıza necə təsir etdi?
– Katarina Batistaya həyat vermək çox xoş idi. 1920-ci illərdə əslində feminist bir qadın idi.
-“Katarina Batista” obrazı, “Tikan və qızılgül” teleserialı ilə bağlı unudulmaz xatirələriniz nədir?
– Səsyazma vaxtı ilə bağlı xatirələrim çoxdur. İşdən kənarda da tanış olduğumuz bir qrup yaratdıq. Bir-birimizin işinə çox bağlı, heyran idik. Səhnədə və kənarda maraqlı işlər görərdik.
– “Katarina Batista” olmağın ən böyük çətinliyi nə idi?
– Analıq məzuniyyətimi bitirən kimi yenidən çəkilişə qayıtmalı oldum. Bu ən böyük çətinliyim idi. İlk övladım olan Felipeni dünyaya gətirmişdim. Analığı işim ilə necə birləşdirəcəyimi öyrənməli idim.
– “Tikan və qızılgül” teleserialındakı tərəf müqabiliniz olan məşhur “Juliao Petruçio” kimi kişi ilə ailə qurardınız?
-Mən heç vaxt “Petruçio” kimi bir kişi ilə evlənməzdim. Rs, rs, rs … Heç vaxt “maço” kişi ilə yaşamaram.
-Sizcə bir kişi, həyat yoldaşı necə olmalıdır?
-Həyat yoldaşı xanımına hörmət etməli, sevgi dolu olmalı və dəyər verməlidi.
– “Tikan və qızılgül” serialındakı tərəf müqabiliniz olan aktyor Eduardo Moscovislə (Petruçio) münasibətləriniz necədir?
– Eduardo Moscovis əla dost, gözəl bir həmkardır. Bu işbirliyimiz üçün ona sonsuz dərəcədə təşəkkür edərəm. “Tikan və qızılgül”dən sonra bir daha heç vaxt birlikdə çalışmadıq, amma bir gün bunun olacağını bilirəm.O, televiziya, kino və teatrda gözəl əsərləri olan bir aktyor kimi həyatını yaşayır.
– “Katarina Batista” ilə sizin bənzərlikləriniz varmı?
-Düşünürəm ki, “Katarina Batista” ilə ən böyük oxşarlığım feminizmdir.
– Qadınlar üçün 5 qızıl qayda nədir?
-Hər hansı bir qaydanın olduğunu düşünmürəm… Bunun çox özəl olduğunu fikirləşirəm. Biz – qadınların çox fərqli və çətin yollarımız var.
-Ən çox təəssüfləndiyiniz xüsusiyyətiniz nədir?
– Mən özümə sevgi ilə baxmağa çalışan insanam. Özümlə bağlı çox sevmədiyim xüsusiyyətləri dəyişdirməyə çalışıram.
– Sizcə azadlığın həddi harada bitir?
– Hər kəsin azadlığı başqalarına hörmətlə bağlı olmalıdır.
– Qarşılaşdığınız ən böyük çətinliyiniz nə olub?
– Yaşadığım ən böyük çətinlik bəlkə də çox yaxın insanlarımı itirməkdi.
-Zaman sizdən nəyi aldı, nəyi verdi?
– Zaman insanın ən böyük sərvətlərindən biridir. O, bizə müdriklik bəxş edir.
-Dünyanın sizə öyrətdiyi ən vacib dərs nədir?
– Kollektivə ehtiyac duyan varlıqlar olduğumuzu həyat bizə öyrətdi. Mən bunu həyatın bizə bir dərsi kimi qəbul edirəm.
– Dünyaya ən böyük mesajınız nə olardı?
– Dünyaya mesajım belədir: “Gəlin bir-birimizi sevək, hörmət edək. Və tolerant olaq”.
– Həyat fəlsəfənizi 3 cümlə ilə necə ifadə edərsiniz?
– Hələ də həyat fəlsəfəmi araşdırıram. Amma şübhəsiz ki, təbiətə və ətraf mühitə qayğı məndə çox güclüdür.
– Din sizin üçün nə deməkdir?
– Din sənət və psixoanaliz kimi mənim üçün vacibdir. Onlar şəfa, rahatlıq və azadlıq yollarıdır. Mənəviyyata daha çox diqqət ayırıram və bütün dinlərə ən yüksək hörmətlə yanaşıram.
– Əgər keçmişə qayıda bilsəydiniz, nə edərdiniz?
– Keçmişə qayıda bilsəydim, etdiyim hər şeyi yenidən edərdim. Amma daha çox zövq və daha az ağrı axtarardım.
– Sizi xoşbəxt edən nədir?
– Məni ən xoşbəxt edən şey, göstərdiyim münasibətin işıq saçdığını hiss etməyimdir.
– Tikan, yoxsa qızılgül?
– Tikanlı gül.
– Adriana Esteves bir ana, həyat yoldaşı kimi necədir?Analara nə demək istərsiniz?
– Bu baxımdan özümdən çox razıyam. Ailəmin birlikdə və sülh içində böyüdüyünü hiss edirəm. Analara necə məsləhət verəcəyimi bilmirəm. Şəfqətimiz bizi daha da gücləndirir. Düşünürəm ki, doğum evində biz analar eyni şeyi hiss edirik.
– Bakı, Azərbaycan haqqında fikirlərinizi bilmək istərdik.
– İlk dəfədir ki, sizin ölkənizdən bir jurnalistə müsahibə verirəm. Söz verirəm ki, ölkənizlə daha çox maraqlanacağam və öyrənəcəyəm.
Fürsətdən istifadə edərək işimə göstərdiyiniz sevgi, maraq və hörmət üçün sizə təşəkkür etmək istəyirəm.
-Sizi Azərbaycanda sevən insanlara nə demək istərsiniz?
-Qucaqlayıram və salamlarımı göndərirəm.
