Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin təsdiq etdiyi plana əsasən mayın 16-dan Azərbaycan Ordusunda qoşun növlərinin cəlb edilməsi ilə təlimlər keçirilir.
Alp.az xəbər verir ki, müdafiə nazirinin rəhbərliyi ilə keçirilən təlimə 15000 nəfərədək şəxsi heyət, 300-dək tank və digər zirehli texnika, 400-dək müxtəlif çaplı raket və artilleriya qurğusu, yaylım atəşli reaktiv sistemləri, minaatan və tank əleyhinə vasitələr, 50-dək hərbi aviasiya və müxtəlif təyinatlı pilotsuz uçuş aparatları cəlb olunub.
Təlimlərdə Vətən müharibəsində qazanılan döyüş təcrübəsi nəzərə alınmaqla əsas diqqət qoşunların idarəolunması, döyüşə hazırolma vəziyyətinə gətirilməsi və yenidən qruplaşması, o cümlədən ümumqoşun birlikləri, Raket və Artilleriya Qoşunları, aviasiya, Xüsusi Təyinatlı Qüvvələr arasında döyüş uzlaşması və qarşılıqlı fəaliyyətin təkmilləşdirilməsinə yönəldilib.
Mayın 20-dək davam edəcək təlimlərdə qoşunlar eyni zamanda qanunsuz silahlı qruplaşmaların təxribatlarının qarşısının alınması və əks fəaliyyətlə terrorçuların zərərsizləşdirilməsi üzrə tapşırıqlar da icra edilir. Bu təlimlər rəsmi İrəvanı qorxuya salıb. Erməni mətbuatı mütamadi olaraq Azərbaycan Silahlı Qüvvələrinin anterror əməliyyatının keçirəcəyini yazırlar. Azərbaycan anterror əməliyyatı keçirdə bilərmi?
Yeni tv-nin qonağı olan hərbi ekspert Ramil Məmmədli hərbi əməliyyatlar və yaxud anterror əməliyyatının keçirilməsinə toxunaraq qeyd edib ki, əgər ermənilər 10 noyabr razılaşmasına riayət etməsələr, o zaman Azərbaycan tərəfi anterror əməliyyatı keçirdə bilər.
