44 günlük Vətən müharibəsində qəhrəmanlığı ilə dastan yazan oğullarımızdan biri də bu gün doğum günü olan şəhidimiz Tural Həsənovdur. Tural əslən gözəlliyi ilə göz oxşayan Laçından idi. Amma Tural Bakıda Qaradağ rayonunun Sahil qəsəbəsində doğulmuşdu. Torpaqların ermənilər tərəfindən işğalından sonra məcburi köçkün kimi gələn Həsənovlar ailəsində 15 iyun 1997-ci ildə bir oğlan doğuldu. Tural qoydular adını. Kiçik yaşlarından Tural hər kəsin sevimlisinə çevrildi. Turalın elə yaşadığı qəsəbə də “Ümid” adlanırdı. Tural da hər yeni günə, yeni ümidlə Laçına qayıdacağına inanırdı.
2003-cü ildən Qaradağ rayonunun Ümid qəsəbəsindəki 294 saylı orta məktəbin 1-ci sinfində oxumağa başladı Tural. 2014-cü ildə həmin məktəbi bitirib və elə həmin il Lənkəran Dövlət Universitetinin İngilis dili (tərcüməçi) fakültəsinə qəbul olub. 2018-ci ildə həmin universitetdən məzun oldu. Hər yeni gün üçün darıxan Tural cəmi 5 gün sonra 2018-ci il iyul ayı çağırışı ilə hərbi xidmətə getdi. 2019-cu il iyul ayında hərbi xidmətdən tərxis olundu. Tural da bütün Azərbaycan gənci kimi, Ali Baş Komandanın döyüş əmrini gözləyirdi. O günün uzaqda olmayacağına Tural da əmin idi. Və bu gün gəldi. Tural 2020-ci il sentyabr ayının 21-də Səfərbərlik xidmətinin çağırışı ilə hərbi xidmətə çağrıldı. Sentyabrın 27-də başlayan Vətən müharibəsində Tural bir çox ağır döyüşlərin iştirakçısı oldu. Dostlarına “Arzularım çin oldu” deyirdi, Tural. Vətən müharibəsi uzun bir döyüş yolu keçən Tural Ali Baş Komandan tərəfindən “Cəbrayılın azad olunmasına görə” medalı, “Şuşanın azad olunmasına görə” medalı, “Füzulinin azad olunmasına görə” medalı təltif edildi. Müharibə bitdikdən sonra onun evə dönəcəyi günü gözləyən yaxınları bir səhəri acı xəbərlə açdılar. Tural şəhid olub.
Tural Həsənov 2020-ci il dekabr ayının 30-da Xocavənd yolunda xidməti maşınlarında minaya düşərək şəhid oldu.
Tural 31 dekabr 2020-ci ildə Qaradağ rayonunun Ümid qəsəbəsində dəfn olunub.
Ruhu şad olsun!
Qoşqar Salmanlı
