Türkiyənin Antalya bölgəsinin Manavgat rayonunda şiddətli meşə yanğınları hələ davam edir. Türkiyə KİV-ləri xəbər verir ki, Manavgat rayon mərkəzinə 30 kilometr məsafədə başlayan yanğın güclü küləyin təsiri ilə sürətlə yayılıb və qəsəbəni də əhatə edib. 4 günə yaxındır davam edən yanğınsöndürmə fəaliyyətləri nəticəsində bu bölgədə alovlar nisbətən səngiyib, havadan dronlarla çəkilən görüntülər isə savaş meydanını xatırladır. Belə ki, Manavgat qəsəbəsində bir çox evlər yanıb, həyətyanı təsərrüfatlara ciddi ziyan dəyib. Yanğın hazırda Antalya-Bodrum sahil xətti üzrə onlarla ərazidə davam edir.
Bu gün axşama doğru Bodrumda yeni yanğın ocağı yaranıb və alovlar sürətlə yayılmağa başlayıb. Və Alevler, İçmeler məhəllələrində 5 ulduzlu otellərin də yerləşdiyi əraziyə çatıb. Yanğınla bağlı 5 ulduzlu 3 oteldən turistlər təxliyyə edilib. Yağınsöndürənlər 1 vertolyotla və bir neçə yanğınsöndürən maşınla təcili müdaxilə edərək alovların qarşısını ala biliblər.
