Amerika ordusu səsdən sürətli aviasiya üçün yeni axtarışlara başlayıb. Alp.az xəbər verir ki, yanvarın 11-də “Boom Supersonic” şirkətinin mətbuat xidməti ABŞ Hərbi Hava Qüvvələrinə daxil olan və kommersiya texnologiyalarının inkişafı ilə məşğul olan AFWERX və AFVentures bölmələri ilə müqavilə imzalandığını elan edib.
60 milyon ABŞ dolları dəyərində müqavilələr səsdən sürətli “Overture” sərnişin təyyarəsinin yaradılmasına yönəlib. Eyni zamanda, “Boom Supersonic” göstərir ki, gələcəkdə mülki təyyarə əsasında ABŞ Hərbi Hava Qüvvələri üçün texnika xətti yaradıla bilər.
Overture ilk uçuşunu 2026-cı ildə edəcək və üç ildən sonra sərnişin hava daşımalarına başlaya biləcək. Təyyarə 1,7 Mach-a qədər sürət yığa, 65-88 sərnişini qəbul edə biləcək və xüsusi yanacaq sayəsində işləyəcək.
Əvvəllər ABŞ Hərbi Hava Qüvvələri səsdən sürətli sərnişin təyyarəsi hazırlayan Exosonic-i maliyyələşdirirdi. Bundan sonra Hərbi Hava Qüvvələri üçün Exosonic şirkəti minimal şok dalğaları ilə səsdən sürətli dronlar hazırlayacaq.
