Azərbaycan əsilli rusiyalı milyarder Araz Ağalarov hesab edir ki, prezident Vladimir Putin Rusiyada yüksək inflyasiyanın səbəblərindən birinin ABŞ-dakı inflyasiya olduğunu deməkdə haqlıdır. Alp.az xəbər verir ki, Ağalarov “Komsomolskaya Pravda”ya iqtisadi mövzularla bağlı danışarkən belə deyib.
Putin demişdi ki, Amerikadakı inflyasiyanı dollarla birlikdə Rusiyaya gətirirlər, onun da üstünə Rusiyadakı inflyasiyanı gələndə qiymətlər daha sürətlə artmış olur.
“Gəlin baxaq. ABŞ-ın borcu bir il ərzində 5 trilyon dolla artıb. Onların borcu 22, ya 23 trilyon idi, indi deyəsən 28, yaxud 29 trilyondur. Yəni onlar böyük həcmdə yeni pullar buraxıblar. Bu da yumşaq pul-kredit siyasəti adlanır. Bununla əlaqədar dollar da bir az dəyərdən düşüb. Və dollara nisbətdə rubl da pandemiya dövründə dəyərdən düşüb. Yəni bizdə inflyasiyanın üstünə başqa inflyasiya gəlir”,-Ağalarov deyib.
Biznesmen hesab edir ki, dollardan asılığın azadılması mümkün deyil. Çünki bu gün hər şey dollarla ölçülür, dollar metr və ya santimetr kimi beynəlxalq ölçü vahidinə çevrilib. “Bizim nə deməyimizdən asılı olmayaraq dollar ölçü vahididir. Həm ÜDM, həm neftin qiyməti, qazın qiyməti, nə desəniz hamısı dollarla ölçülür. Yəni metr və santimetr beynəlxalq ölçü vahidi olduğu kimi”,-Ağalarov deyib.
Biznesmen Rusiyada son vaxtlar mənzillərin qiymətlərinin sürətlə artmasına da münasibət bildirib. Deyib ki, bu qiymət artımının güzəştli ipotekaya görə baş verdiyi haqda fikirlərlə razılaşmır. Ağalarov bildirir ki, məsələ Rusiyada kifayət qədər mənzilin tikilməməsindədir. “Sivil ölkələrdə, o cümlədən Çində adambaşına ildə 1 kvadratmetr mənzil sahəsi tikilir. Əgər Çində milyard yarım əhalinin yaşadığını nəzərə alsaq onlar ildə 1.5 milyard kvadratmetr mənzil sahəsi tikirlər. ABŞ-da baxmayaraq ki, əhalinin mənzillə təmin olunması səviyyəsi yüksəkdir, orada da ildə adambaşına orta hesabla 1 kvadratmetr mənzil tikilir, yəni 300 milyon kvadratmetr. Bizdə isə hər il cəmi 80 milyon kvadratmetrə yaxın yeni mənzil sahəsi istifadəyə verilir. Yəni adambaşına yarım kvadratmetr. İkincisi, siz bura qəza vəziyyətində olan və istifadəyə yararsız böyük həcmdə mənzil sahəsini də əlavə etsəniz belə çıxır ki, bizdə sadəcə olaraq mənzil qıtlığı hökm sürür! Bu qıtlıq hesabına da qiymətlər artır”,-Araz Ağalarov bildirib.
