Hərb meydanında dünyaya səs salan xüsusi təyinatlılarımız Vətən müharibəsində öz qəhrəmanlıqları ilə yaddaşlara həkk olundu. Belə igidlərimizdən biri də İmişlidən olan şəhid Nemət Cavadlıdır. 25 yaşlı qəhrəmanımız Vətən müharibəsində düşmənə sözün əsl mənasında cəhənnəmi yaşadıb.
25 yaşlı şəhid Nemət hələ kisik yaşlarından hərbçi sənətinə marağı ilə seçilib.
Nemət Cavadlı 1995-ci il iyunun 3-də İmişli rayonunda anadan olub. 2013-2014-cü illərdə Bakı şəhərində hərbi xidmətdə olub. 2015-ci ildə Gizir kurslarını oxuyub, kursu bitirdikdən sonra Qusar rayonunda BTR komandiri kimi hərbi fəaliyyətə başlayıb. 2016-cı il hərbi hissənin tərkibində BTR komandiri kimi döyüş bölgəsində xidmət edib. Döyüş bölgəsindən sonra öz hərbi hissəsinə qayıdaraq Hərbi Komissiyanın şeçimi ilə XTQ-də kurs keçib. Kursu başa vurduqdan sonra yenidən təyinatla onu Cəlilabad rayonuna göndəriblər.
Nemətə heç öz nişan mərasimində iştirak etmək nəsib olmayıb. Bunu şəhidin bacısı Fatimə xanım deyib.
“2020-ci il sentyabrın 27-də II Qarabağ müharibəsi başlayandan döyüş bölgəsində olub. 35-36 gün müharibədə döyüş yolu keçib. Müharibə zamanı düşmənin 5 tankını, 2 hərbi maşınını, içində canlı qüvvəsi omaq şərtilə, ayrı-ayrı yerlərdə yenə xeyli sayda canlı qüvvəsini məhv edib.”
Nemətin döyüş yolu Kəlbəcərdən başlayıb, Cəbrayıl, Füzuli istiqamətində bütün ərazilərin işğaldan azad edilməsində iştirak edib.
Sonuncu dəfə anası ilə danışanda qayıdacağını bildirib. Amma Nemət bu dəfə vədinə əməl edə bilməyib.
Axırıncı döyüşü Daşaltının alınması uğrunda olub. Şuşanın 3 kilometrliyində oktyabrın 31-i Daşaltı kəndində şəhid olub.
Zəhməti ilə ev tikdirdi özünə, amma bir gecə evində yatmaq qisməti olmadı. Ən böyük arzusu torpaqlarımızı işğaldan azad etmək idi.
Şəhid olduqdan sonra “Qarabağ ordeni” və “Vətən uğrunda” medalları ilə təltif olunub”.
