“Rusiya hərbi bazasının Gümrüdən çıxarılması ilə bağlı məlumat gülüncdür”
Ermənistan hakimiyyəti Ermənistanla Türkiyə arasında münasibətlər tənzimləndikdən sonra 102-ci Rusiya hərbi bazasının Gümrüdən çıxarılması ilə bağlı məlumatı absurd hesab edir. Alp.az xəbər verir ki, bu barədə erməni mediası məlumat yayıb.
“Ermənistan və Rusiya strateji tərəfdaşdırlar. Hazırda Ermənistanla Türkiyə arasında dialoq başlayıb. Bu dialoq yeni başlayıb”, – hakim “Mülki müqavilə” fraksiyasının katibi Artur Ovhannisyan jurnalistlərə bildirib.
O qeyd edib ki, bu cür məlumatların yayılmasının heç bir əsası yoxdur: “Ona görə də burada şərh ediləcək bir şey yoxdur. Bizim reallıqda bazanın çıxarılmasından söhbət gedə bilməz”.
“Mülki müqavilə” fraksiyasının deputatı Vaan Hovakimyan isə xatırladıb ki, Rusiya hərbi bazasının Gümrüdə qalma müddətinin 2049-cu ilə qədər uzadılması barədə razılıq var.
“Belə məlumatların yayılması sadəcə gülüncdür”, – Hovakimyan bildirib.
Xatırladaq ki, Ermənistanın “Joqovurd” qəzeti yazıb ki, Türkiyə ilə münasibətlər nizamlandıqdan sonra Rusiyanın 102-ci hərbi bazasının Gümrüdən çıxarılması mümkündür.
