Rusiya-Ukrayna müharibəsini maraqla izləyən avropalı ekspertlər savaşın gedişi ilə bağlı diqqətçəkən şərhlər verirlər.
Alp.az xəbər verir ki, ingilis hərbi ekspert Mayk Martin isə müharibədən sonra Ukraynanı gözləyən böyük təhlükə haqda danışıb.
Son vaxtlar Putinin qoşunlarının Ukraynada köhnəlmiş taktika və aşağı əhval-ruhiyyə səbəbindən çətin günlər keçirdiyi iddia olunur. Bununla belə, Martin hesab edir ki, Rusiya geri çəkilsə belə, Ukraynanın çətin vəziyyəti bitməyə bilər.
İngilis ekspert deyib ki, Putinin ruhdan düşmüş qoşunlarını gücləndirmək üçün Suriya kimi ölkələrdən muzdlu döyüşçülər gətirmək kimi addımları çarəsizlik əlaməti olmaqla yanaşı, Rusiyanın əlini gücləndirməyəcək.
Bununla belə, Martin xəbərdarlıq edib ki, Ukrayna üçün növbəti böyük təhlükə vətəndaş müharibəsi ola bilər. Onun sözlərinə görə, bir çox sıravi ukraynalı xarizmatik liderləri, Prezident Vladimir Zelenskidən ilhamlanaraq silahlanıb cəbhədə könüllü döyüşür. Martin hesab edir ki, bu, Ukrayna üçün böyük təhlükə yarada bilər.
“Onlar hər kəsi silahlandırıblar. Ətrafda çoxlu sayda silahlı var. Hətta ruslar separatçı bölgələrdəki yaraqlılara pul ödəyirlər. Müharibə bitsə belə, zəif təlim keçmiş könüllülər səhvlər edə və səhvən mülki insanları öldürə bilərlər”, – ekspert vurğulayıb.
Vəziyyətin nəzarətdən çıxması ilə prosesin vətəndaş müharibəsinə qədər gedə biləcəyini qeyd edən Martin vurğulayıb:
“Silahlıların və ya silahlı qruplaşmaların öz aralarında döyüşməyə başlaması üçün zəmin hazırdır. Bunların hamısı vətəndaş müharibəsi üçün reseptlərdir”.
