Dünyada Türkiyənin Pilotsuz Uçan Apparatlarına (PUA) olan maraq artmaqdadır. Azərbaycan Ordusunun arsenalında olan Türkiyənin “Bayraktar” PUA-larının İkinci Qarabağ müharibəsində uğurla istifadə olunması bu yeni nəsil hərbi aviasiya məhsuluna olan marağı birə-beş artırdı.
Alp.az xəbər verir ki, müharibədən sonra bir sıra ölkələr ordularının “Bayraktar”la gücləndirilməsində maraqlı olduqlarını ortaya qoydular. Bu sıraya Albaniya da qoşulub. Belə ki, Albaniya parlamenti Türkiyə istehsalı olan PUA-ların alınması üçün büdcədən pul ayrılmasını təsdiqləyib. Azvision.az xəbər verir ki, bu barədə “Air Recognition” məlumat yayıb. Qeyd edilir ki, Türkiyənin “TRT World” televiziya kanalında gedən bir xəbərə görə, artıq Albaniya hökuməti “Bayraktar TB2” PUA-larını alacağı təsdiqlənib. Məqalədə hökumətin məhz İkinci Qarabağ müharibəsi zamanı Azərbaycan silahlı qüvvələrinin “Bayraktar”lardan uğurlu istifadə etməsindən sonra Türkiyə istehsalı olan hücum PUA-larını seçdiyi yazılıb. PUA-ların alınması üçün büdcədən 8,2 milyon avro məbləğində əlavə vəsaitin ayrılacaq.
Yazıda o da xatırladılır ki, 2020-ci ildə COVID-19 pandemiyası başlamazdan əvvəl Bolqarıstan hökuməti tərəfindən də altı “Bayraktar TB2” -nin alınması ilə bağlı danışıqlar aparılmışdı. Ancaq karantin tədbirlərinin ləğvindən sonra hərbi büdcəyə yenidən baxıldı və satınalma 2021-ci ilin ikinci yarısına qədər təxirə salındı.
Qeyd edək ki, ötən il Vətən müharibəsi zamanı Azərbaycan ordusunda döyüşlərdə aktiv şəkildə istifadə olunan “Bayraktar”ların effektli döyüş vasitələri olması sübut olunduqdan sonra Ukrayna, Albaniya, Bolqarıstanla yanaşı bir sıra Asiya ölkələri də PUA-ların məhz Türkiyədən alınmasına qərar veriblər.
