Aprelin 11-də Azərbaycan xarici işlər naziri Ceyhun Bayramovun Ermənistan xarici işlər naziri Ararat Mirzoyan ilə telefon danışığı baş tutub. Tərəflər, iki dövlətin liderləri səviyyəsində əldə olunmuş razılaşmaların davamı olaraq, gələcək sülh sazişinin hazırlanması üzrə iş, Birgə Sərhəd Komissiyasının təşkili, habelə humanitar məsələlər üzrə fikir mübadiləsi aparıblar.
Bəs iki ölkənin XİN rəhbərlərinin vasitəçilərsiz birbaşa təmasları danışıqlar prosesində irəliləyişə, yekun nəticədə sülh anlaşmasına gətirib çıxara bilərmi?
Mövzu barədə Redaktor.az-a açıqlama verən keçmiş xarici işlər naziri, politoloq Tofiq Zülfüqarovun sözlərinə görə, hələ ki, sadəcə layihələr, fikirlər təqdim edilib:
“Bu, sadəcə telefon zəngi idi. Mən belə başa düşdüm ki, əlaqə saxlamaq yolları, sənədlərin və fikirlərin mübadiləsi üçün hansısa imkanların dəqiqləşdirilməsi idi. Bəlkə də hanısa layihələr göndərilib. Hələlik ola bilər ki, Azərbaycan tərəfi sənədin layihəsini təklif edib. Sənəd var. Azərbaycan öz irəli sürdükləri prinsiplər əsasında erməni tərəfə layihəni təqdim edib. İndi erməni tərəfi bunun üzərində işləyib öz təkliflərini verəcək. Ola bilsin ki, bu danışıqlar, təmaslar internet vasitəsilə baş verəcək. Fikir mübadiləsi məhz bu yöndə olacaq”.
Politoloq qeyd etdi ki, Ermənistan tərəfi danışıqların tam əksinə fikirlər səsləndirir:
“Doğrusu mənim fikrim ondan ibarətdir ki, Ermənistan tərəfi hələ də ziddiyyətli bəyanatlar verir. İstəyirlər ki, onların əsas kimi qəbul etdikləri prinsiplərə aid olsun. Bəlkə də düzəlişlər, təkliflər ola bilər. Amma bununla yanaşı belə bir fikir söylənilir ki, onlar üçün Qarabağın statusu mövzusu əsas əhəmiyyət kəsb edən mövzudur. Mən istisna etmirəm ki, danışıqlar və təmaslar vaxtı Ermənistan tərəfi bu razılıqların tam şəkildə əksinə olan təkliflər verəcək. Çünki Azərbaycan tərəfinin əsas niyyəti ondan ibarətdir ki, tərəflər bir-birinin ərazi bütövlüyünü tanımaqla və suverənliyə hörmət etməklə əlaqələrin bünövrəsini qoysunlar. Bununla əlaqədar olaraq Ermənistan fərqli fikirlər səsləndirir. Bu baxımdan, bu bəyanatları nəzərə alaraq, mən elə də çox ümidli deyiləm”.
