Ermənilər Qarabağ savaşında minlərlə vətən oğlu şəhidlik zirvəsinə ucalıb. Onların içərisində yüksək rütbəli hərbiçilər də var. Bu yazımızda döyüşlərdə şəhid olan generallarımız haqqında məlumat verəcəyik.
İsmət Qayıbov
İsmət İsmayıl oğlu Qayıbov 1942-ci il oktyabr ayının 8-də Azərbaycanın Gəncə şəhərində anadan olub.
Gəncə şəhərində hazırda adını daşıdığı 1 saylı orta məktəbdə təhsilini bitirdikdən sonra 1963-cü ildə əmək fəaliyyətinə başlayan İsmət 1967-ci ildə hüquq fakültəsində təhsilini başa vurur. 1971-ci ildə respublika prokurorluq orqanlarına işə qəbul edilir. 1990-cı ilin avqustunda Azərbaycanın Baş prokuroru vəzifəsinə təyin edilib.
Müstəqil Azərbaycan respublikasının ilk Baş prokuroru olan İsmət Qayıbov 1991-ci il noyabr ayının 20-də Qarabağda Xocavənd rayonunun Qarakənd kəndi yaxınlığında Ağdam rayonunun Mərzili kəndi ərazisində bir sıra digər dövlət xadimi ilə birlikdə içində olduğu “Mi-8” vertolyotunun erməni hərbi birləşmələri tərəfindən vurulması nəticəsində şəhid olub. Azərbaycanın ilk Baş prokuroru Qayıbovun rəsmi dəfn mərasimi Bakıda keçirilib və mərhum Fəxri Xiyabanda dəfn olunub.
Hazırda Bakıdakı stadionlardan biri, eləcə də neft tankeri, ölkədə bir çox məktəb və küçə İsmət Qayıbovun adını daşıyır.
Məhəmməd Əsədov
Məhəmməd Əsədov 1941-ci il dekabr ayının 5-də Zəngilan rayonunun Baharlı kəndində anadan olub.
1958-ci ildə orta məktəbi bitirib, həmin ildə Bakı Statistika Texnikumuna daxil olub. 1960-cı ildə həmin texnikumu müvəffəqiyyətlə başa vurub və Zəngilan rayonunda inspektor vəzifəsində çalışıb. 1965-ci ildə S.M. Kirov adına Azərbaycan Dövlət universitetinin “Maliyyə və kredit” fakültəsinə daxil olub.
1973-1975-ci illərdə onu Sumqayıt Şəhər Partiya Komitəsində sənaye şöbəsinin müdiri, 1975-1978-ci illərdə isə Təşkilat şöbəsinin müdiri vəzifəsinə təyin ediblər. 1978-ci ildə Məhəmməd Əsədov Ağsu Rayon İcraiyyə Komitəsinin sədri vəzifəsinə göndərilib. 1983-1986-cı illərdə Jdanov (indiki Beyləqan) Rayon Partiya Komitəsinin birinci katibi vəzifəsində işləyib. 1986-1988-ci illərdə Mərkəzi Komitədə inzibati orqanlar şöbəsinə müdirlik edib. 1988-1989-cu illərdə Ağdaş Rayon Partiya Komitəsinin birinci katibi vəzifəsində işləyib. 1989-1990-cı illərdə Quba Rayon Partiya Komitəsinin birinci katibi olub.
1990-cı il noyabr ayının 5-də Məhəmməd Əsədova general-mayor rütbəsi verilir. 1991-ci ilin noyabr ayına qədər Daxili İşlər naziri vəzifəsində çalışır. Məhəmməd Əsədov 1990-cı ilin may ayında Azərbaycan Respublikasının Daxili İşlər naziri vəzifəsinə təyin edilib. Məhəmməd Əsədov 1991-ci ilin noyabrında Azərbaycan Silahlı Qüvvələrinin yaradılmasını tezləşdirmək, ordu quruculuğu işində mərkəzlə hüquq-mühafizə orqanları arasında birgə işin təşkilini həyata keçirmək üçün dövlət müşaviri təyin olunur.
Qarakənd üzərində üç yüz metr yüksəklikdə uçan Mİ-8 N72 vertolyotu 1991-ci il noyabrın 20-də saat 14:42 dəqiqədə vurulub. Həlak olanlar arasında Məhəmməd Əsədov da var idi. Ümumilikdə qəza nəticəsində 22 nəfər həlak olub. Məhəmməd Əsədov Şəhidlər xiyabanında dəfn edilib.
Polad Həşimov
Polad İsrayıl oğlu Həşimov 1975-ci ildə Sumqayıtda anadan olub.
Orta məktəbi həmin şəhərdə bitirib. Sonra Heydər Əliyev adına ali məktəbdə təhsil alıb və təhsilini Türkiyədə davam etdirib. O, Murov və Daşkəsən kimi bir neçə döyüş bölgəsində xidmət edib.
Polad Həşimov 2016-cı ildə aprel döyüşlərində iştirak edib və xəsarət alıb. P.Həşimov 2003-cü ildə mayor rütbəsində olarkən Prezident Heydər Əliyevin sərəncamı ilə “Hərbi xidmətlərə görə” medalı ilə təltif edilib. 2009-cu ildə polkovnik-leytenant Həşimov Prezident İlham Əliyevin sərəncamı ilə “Vətən uğrunda” medalına layiq görülüb. 2014-cü ildə III dərəcəli “Vətənə xidmətə görə” ordeni ilə təltif edilib. 2016-cı ildə aprel döyüşləri zamanı göstərdiyi qəhrəmanlığa görə Prezident İlham Əliyevin sərəncamı ilə II dərəcəli “Vətənə xidmətə görə” ordeninə layiq görülüb.
2019-cu ildə Prezident İlham Əliyevin sərəncamı ilə Polad Həşimova general-mayor hərbi rütbəsi verilib.
General-mayor Polad Həşimov 2020-ci ilin iyulun 13-dən 14-nə keçən gecə Azərbaycan-Ermənistan sərhəddinin Tovuz rayonu istiqamətində gedən döyüşlərdə şəhid olub. General Həşimov II Fəxri Xiyabanda dəfn olunub.
