“Bildiyiniz kimi, cənab Prezident İlham Əliyev iyul ayının 25-də Masallı, Lerik və Göygöl Rayon İcra Hakimiyyətlərinin yeni başçılarını vəzifələrinə təyin olunmaları ilə əlaqədar qəbul etdi və onlara tapşırıqlar verdi. Ölkə başçısı çıxışında regionların sosial-iqtisadi inkişafı sahəsində əldə olunan uğurları qeyd etməklə yanaşı, vətəndaş məmnunluğunun təmin olunması məqsədilə məmurlar qarşısında duran mühüm vəzifələrə də toxundu”.
Bu fikirləri Moderator.az-a açıqlamasında Milli Məclisin üzvü Tamam Cəfərova deyib.
Deputat bildirib ki, Prezident İlham Əliyevin rəhbərliyi ilə həyata keçirilən islahatlar bütün sahələrdə uğurla həyata keçirilir. Son illərdə bütün rayonlarda regionların sosial-iqtisadi inkişafı Dövlət Proqramının icrası nəticəsində geniş abadlıq-quruculuq işləri görüldü, böyük infrastruktur layihələri icra edildi və uzun illər ərzində insanları narahat edən problemlərin böyük hissəsi aradan qalxdı. Ölkənin bütün regionlarında elektrik enerjisi ilə təchizat, qazlaşdırma, yol infrastrukturu, suvarma, içməli su layihələri, sosial infrastruktur layihələri icra olundu, hər rayonda müasir xəstəxana, tibb ocaqları, bir çox məktəblər inşa edildi. Görülən işlərin nəticəsidir ki, regionların mənzərəsi xeyli dəyişdi. Regionlarla mərkəz arasında fərq xeyli azaldı.
Cənab Prezident ölkədə kadr siyasəti sahəsində həyata keçirilən islahatlara xüsusi toxunaraq, ölkəmizdə gənc kadrların yüksək vəzifələrə təyin olunması kimi müsbət ənənənim formalaşdığını bildirdi. Gənclərə dövlət idarəçiliyi sahəsində göstərilən etimad bir çox aspektdən olduqca önəmlidir. Beləki, gəclər daim innovativliyə, köhnə stereotiplərdən uzaqlaşamağa can atırlar. Bu da dövlət idarəçiliyində yeni yanaşmaların formalaşmasına şərait yaradır. Dövlət Başçısının gənclərə göstərdiyi yüksək etimad onu deməyə əsas verir ki, cənab Prezident İlham Əliyev bütün sahələrdə olduğu kimi dövlət idarəetməsində də gənclərə arxalanır, onlara inanır”.
Fikirlərinin davamı olaraq, millət vəkili bildirib ki, icra başçılarına tapşırıqlarını verərkən cənab Prezident icra başçılarının daim insanlarla təmasda olmalarını xüsusi vurğulamışdır: “İcra başçıları bütün kəndlərdə olmalıdır, kənd camaatının qayğıları ilə yaşamalıdır, onları narahat edən problemləri onların dilindən eşitməlidir və imkan daxilində bu problemləri həll etməlidir. Əgər hər bir kəndin problemi həll olunarsa, demək olar ki, ölkədə insanları narahat edən ciddi problem qalmayacaq”. Cənab Prezidentin də dediyi kimi, bir kəndin probleminin həll olunması, ümumən insanları narahat edən problemin həll olunması və insanların həyat şəraitinin daha da yaxşılaşması deməkdir”.
Cənab Prezidentin çıxışında şəhid ailələrinə xüsusi diqqət göstərilməsi barədə də tapşırıqlar verdiyini deyən millət vəkili Tamam Cəfərova qeyd edib ki, dövlət tərəfindən şəhid ailələrinə diqqət ən yüksək səviyyədədir. İkinci Qarabağ müharibəsindən əvvəl və İkinci Qarabağ müharibəsindən sonra şəhid ailələri daim diqqət mərkəzindədir. Şəhid ailələrinin və müharibə əlillərinin məişət problemləri dövlət xətti ilə həll olunur. Şəhid ailələrinə dövlət tərəfindən mənzillər, fərdi evlər verilmişdir, minlərlə minik maşınları verilmişdir. Bu proses davam etdirilir. Bakı, Sumqayıt və Abşeron rayonlarında şəhid ailələrinin evlə təminatı məsələləri artıq yekunlaşmaq üzrədir. Digər rayonlarda da dövlət xətti ilə bu iş görüləcək. O cümlədən şəhid ailələrini, müharibə əlillərini işlə təmin etmək üçün çoxsaylı tədbirlər həyata keçirilir. Rayon icra orqanlarının nümayəndələri bu kateqoriyadan olan insanlara biganə qalmamalı, əksinə, daim onların yaşayışı ilə maraqlanmalıdır. Heç kəs unutmamalıdır ki, azad edilmiş torpaqlarımıza bayrağımızı sancan bizim qəhrəman əsgər və zabitlərimiz olub. Onlar öz canlarını fəda edib, onlar sağlamlığını itirib, onlar heç nəyə baxmadan, qorxmadan ölümə gedərək Vətənimizi işğalçılardan xilas ediblər. Ona görə hər bir dövlət məmurunun, nəinki dövlət məmurunun, hər bir insanın borcudur ki, onlara arxa, dayaq olsun.
Sonda millət vəkili qeyd edib ki, ölkə başçısının çıxışı bir daha onu deməyə əsas verir ki, Azərbaycan dövlətinin siyasətinin mərkəzində Azərbaycan vətəndaşlarının maraqları dayanır. Azərbaycan xalqı bunu görür və yüksək qiymətləndirir. Azərbaycan xalqı Prezident İlham Əliyevin rəhbərliyi ilə həyata keçirilən islahatları birmənalı olaraq dəstəkləyir. Millət vəkili Tamam Cəfərova belə deyib.
