“Ölkəmizdə mövcud olan geniş və qüdrətli rusiyayönlü “beşinci kolon”un mövcudluğunu nəzərə alsaq, Kremlin Ermənistanla bağlı planları heç də utopik görünmür”.
Alp.az xəbər verir ki, bu fikirləri erməni jurnalist və analitik Tevos Arşakyan yazdığı məqalədə səsləndirib:
“Ötən gün “Hraparak” qəzetində Rusiyadan bir qrup ekspertin, o cümlədən jurnalistlərin, politoloqların, ictimai xadimlərin ölkəmizə gəlməsi ilə bağlı xəbəri oxuyandan sonra nədənsə yadıma Qoqolun “Müfəttiş” komediyası düşdü. Belə çıxır ki, onlar Ermənistanda müharibədən sonra güclənən anti-Rusiya əhval-ruhiyyəsindən narahat olduqları üçün gəliblər. Son günlər onlar Ermənistandakı rusiyayönlü dairələrin nümayəndələri ilə intensiv görüşlər keçirirlər. Ermənistan-Rusiya münasibətlərinin yaxşılaşdırılması, anti-Rusiya əhval-ruhiyyəsinin yumşaldılması məsələlərini müzakirə edirlər. Ancaq sübutlar var ki, görüşlər zamanı həm də yeni birlik dövləti ideyası təbliğ olunur və Ermənistanın müxtəlif dairələrinə bu istiqamətdə təbliğat aparmaq tapşırılır” deyə qəzet yazır.
Analitik Tevos Arşakyan deyir ki, müharibədən sonra erməni cəmiyyəti sanki yuxudan oyandı, Rusiyanın müttəfiq kimi əsl simasını gördü: “Buna görə də, cəmiyyətin şüurlu təbəqəsi tərəfindən xarici siyasət məsələlərinə yenidən baxılmasının gündəmə gətirilməsi təəccüblü deyil. Çətin ki, Ermənistanda ağlı başında olan kimsə bu gün Moskvaya ümid bəsləsin. Üstəlik, Amerika İnstitutlarının ölkədə keçirdiyi sorğuya əsasən, Rusiya Ermənistanın təhlükəsizliyinə təhdid yaradan ölkələrin reytinqində üçüncü sırada qərarlaşıb. İlk yerləri gözlənildiyi kimi Türkiyə və Azərbaycan tutub. Amma Rusiyanın bu siyahıda üçüncü olması təbiidir. Çünki, erməni xalqı son illər Rusiyaya görə çox əziyyət çəkib” – deyə müəllif qeyd edir.
“Burada məsələ heç də sorğunun amerikalılar tərəfindən aparılmasında deyil. Onların bu məsələ ilə heç bir əlaqəsi yoxdur. Axı biz Ermənistanda yaşayırıq və özümüz də görürük ki, cəmiyyətimizdə ruslara münasibət son dərəcə mənfidir. Üstəlik, ölkəmizin həm enerji, həm də nəqliyyat sektorunda Moskvadan hədsiz asılılığını nəzərə alsaq, Rusiya bizə təkcə siyasi və milli baxımdan deyil, həm də iqtisadi cəhətdən təhlükə yarada bilər. Rəsmi İrəvana təzyiq etmək üçün Kremlin bizə verdiyi qazın qiymətini qaldırması, eləcə də Rusiya-Gürcüstan sərhədini bağlaması kifayətdir. Burada ən təəccüblü məqam odur ki, Moskva erməni cəmiyyətində hökm sürən anti-Rusiya əhval-ruhiyyəsini bilsə də, buna rəğmən, Ermənistanı Rusiya və Belarusun İttifaq Dövlətinə daxil etmək istəyir. Bu məsələnin mümkünlüyünü araşdırmaq üçün Ermənistana öz “auditorlarını” göndərir. Sadə dillə desək, Belarusla olduğu kimi, Ermənistanın da Rusiya tərəfindən mənimsənilməsi prosesi həyata keçirilir” – Tevos Arşakyan bildirib.
“Digər tərəfdən, bizim ölkədə geniş və güclü rusiyayönümlü “beşinci kolon”un mövcudluğunu nəzərə alsaq, Kremlin Ermənistanla bağlı planları heç də utopik görünmür. Onun lideri isə təbii ki, Putinin yaxın dostu Robert Koçaryandır. Həmin Koçaryanın təmsilçiləri bu gün parlamentdə oturan “Ermənistan” blokunun üzvləridir. Onun tərəfdarları hələ də Silahlı Qüvvələrdə, xüsusi xidmət orqanlarında təsir gücünə malikdir. Təəssüf ki, 4 ilə yaxındır Paşinyan bu strukturları rusiyayönümlü çirkablardan təmizləyə bilmir və bu gün təkcə özü üçün deyil, bütün ölkəyə ciddi təhlükə yaradır. Axı hakimiyyəti yenidən ələ keçirmək üçün bu adamlar Ermənistanı Rusiyanın boğucu qucağına atmağa, gözlərini qırpmadan ölkənin suverenliyini qurban verməyə hazırdırlar. Postsovet məkanında gedən prosesləri və Kremlin keçmiş imperiyanı dirçəltmək xəyallarını nəzərə alsaq, bunlar artıq söz yığını deyil, üfüqdə görünən təhlükədir. Qəribədir ki, bu təhlükəyə hakimiyyət deyil, biz adi vətəndaşlar və KİV-lər cavab verməli oluruq” – Arşakyan fikirlərini tamamlayıb.konkret.az
