Rusiya desantçıları yanvarın 6-da Alma-Ataya yeridiləndən sonra şəhəri “terrorçulardan təmizləmək” üçün onlara cəmi 48 saat vaxt lazım olub. Bu zaman desantçıların yüzlərlə adamı öldürdüyü bildirilir.
Alp.az xəbər verir ki, bu barədə Rusiya Baş Kəşfiyyat İdarəsinə bağlı olduğu təxmin edilən bir sıra rusdilli resurslar, o cümlədən avia.pro yazır. Digər Rusiya KİV-ləri kimi bu saytlar da Alma-Atada küçələrə çıxanların hamısını “terrorçu” kimi damğalayır.
“Qazaxıstana Rusiya desantçılarının və xüsusi təyinatlı bölmələrin (çox güman ki, GRU xüsusi təyinatlıları nəzərdə tutulur, – red.) yeridilməsi sayəsində yüzlərlə yaraqlını və radikalları məhv etmək, şəhərin böyük hissəsini silahlı cinayətkarlardan azad etmək mümkün olub. Situasiya belədir ki, Qazaxıstanda yerləşdirilmiş Rusiya qüvvələri yaraqlıların dəstələrini ilk ciddi itkilərə məruz qoyub, onları geri çəkilməyə məcbur edib. Bundan sonra radikalların qalıqlarının məhv edilməsi başlayıb”, – sayt yazır. Və Alma-Atada yanvarın 6-dan 8-nədək təhlükəsizlik qüvvələri və etirazçıların nəzarətində olan ərazilərə dair hansı mənbədən götürüldüyü məlum olmayan əməliyyat xəritələri xəbərə əlavə edir.
Bu xəritələrin mənbəyi bilinmir, amma ola bilsin GRU-nun əməliyyat xəritələridir…
Bildirilir ki, yanvarın 6-da “yaraqlılar” Alma-Atanın əsas hissəsinə, o cümlədən mühüm obyektlərə nəzarət edirdi, onlar şəhərin yaşayış rayonları üzərində də nəzarəti ələ keçirməyə çalışırdı.
“Lakin günorta saatlarında Rusiya qoşunları Alma-Ataya girən kimi situasiyanın diqqətlə dəyərləndirilməsi başlandı və yaraqlılara təxminən axşam saat 20 radələrində ilk sarsıdıcı zərbə vuruldu, Rusiya bölmələri Alma-Ata aeroportunu radikallardan təmizlədi və ona nəzarəti ələ aldı, ardınca şəhərin mərkəzi rayonu nəzarət altına alındı, yaraqlıların bir hissəsi ilk müqavimət cəhdi ilə məhv edildi, qalanları qaçmağa başladı”, – GRU ilə əlaqəli resurs hadisələri belə təsvir edir.
Sayt bildirir ki, bundan 5 saat sonra “radikallar” yenidən təşəbbüsü ələ almağa cəhd edib və Alma-Atanın cənub hissəsinə “hücuma başlayıb”, televiziya qülləsini ələ keçirməyə və orada “snayperləri yerləşdirməyə” çalışıblar. “Lakin bununla belə yanvarın 7-i saat 15-ə qədər radikalların əsas hissəsi məhv edilmişdi. Yanvarın 7-i saat 20 radələrində isə terrorçular daha çox itkilər verdilər”, – sayt yazır.
Xatırladaq ki, bundan əvvəl qazaxıstanlı siyasi fəal və insan haqları müdafiəçisi, yanvarın 6-da Alma-Atada baş verənlərin şahidi olmuş Meyrxan Abdumanapov da “Azadlıq” radiosunun rus xidmətinin layihəsi olan sibreal.org saytına rus dilində danışan, tanınma nişanları olmayan və başdan ayağa gara formada olan hərbçilərin həmin gün axşam saatlarında şəhərin mərkəzi meydanına iki istiqamətdən yaxınlaşaraq BTR-lərin pulemyotlarından və avtomatlardan toplaşanları heç bir xəbərdarlıq etmədən atəşə tutduqlarını danışmışdı. Hansı ki, həmin vaxt Alma-Atanın mərkəzi meydanına toplaşanlar arasında silahlılar və Rusiya KİV-lərinin bildirdiyi kimi, “terrorçu radikallar” yox idi…virtualaz.org
