Qırğızıstan prezidenti Sadır Japarovun təyyarəsini Böyük Britaniyaya buraxmayıblar, nəticədə o Qlazqoda keçirilən qlobal iqlim sammitinə kirayə götürülmüş özəl təyyarə ilə getməli olub. Bu haqda Qırğızıstan prezidentinin administrasiyası bildirir.
“Dövlət başçısının uçduğu “1 nömrəli bort”- Tu-154 təyyarəsi Avropa İttifaqının və Böyük Britaniyanın texniki normalarına cavab vermir. Bununla əlaqədar olaraq Qırğızıstan tərəfini bu tip təyyarənin ölkə ərazisinə enməsinin mümkün olmadığı haqda xəbərdar ediblər. Bu tələblərə əsasən Qırğızıstan nümayəndə heyətinin özəl təyyarədə uçması barədə qərar verilib”,-açıqlamada deyilir.
Bildirilir ki, Sadır Japarov Qlazqoya “Embraer Lineage 1000” biznes-sinif təyyarəsində uçub. Həmin Tu-154 təyyarəsi isə Rusiya prezidenti Vladimir Putin tərəfindən 2006-cı ildə Qırğızıstanın o vaxtkı prezidenti Kurmanbek Bakiyevə hədiyyə edilmişdi. Təyyarə 1993-cü ildə istehsal olunub. Avropa İttifaqı artıq uzun illərdir ki, Tu-154 təyyarələrini öz hava məkanına buraxmır. Bu təyyarələr əsasən istismardan çıxıb və çox az sayda, daxili reyslər üçün istifadə olunur.
