Özünü vəzifəli şəxs kimi təqdim edərək dələduzluq etməkdə ittiham olunan Babayev hakim qarşısına çıxarılıb. Məlum olub ki, o özünü DTX mayoru kimi təqdim edirmiş.
Alp.az xəbər verir ki, Bakı Ağır Cinayətlər Məhkəməsində dələduzluqda ittiham olunan Zaur Babayevin cinayət işi üzrə məhkəmə araşdırması başlayıb.
Hakim Zeynal Ağayevin sədrliyi ilə keçirilən məhkəmə iclasında məlum olub ki, bu iş üzrə daha bir nəfər- Mərhəmət Hüseynov da cinayət məsuliyyətinə cəlb olunub.
Zaur Babayev həbsdə olsa da Mərhəmət Hüseynov barəsində polis nəzarətinə verilmə qətimkan tədbiri seçilib.
Təqsirləndirilən şəxslərin anket məlumatları dəqiqləşdirilib zaman aydın olub ki, Mərhəmət Hüseynov təmizlik işçisidir, Bakıda süpürgəçiliklə məşğul olur.
Baş Prokurorluğun Mətbuat xidmətindən yayılan məlumatda bildirilir ki, Baş prokuror yanında Korrupsiyaya qarşı Mübarizə Baş İdarəsində Babayev Zaur Xudabaxış oğlunun qanunsuz hərəkətləri barədə daxil olan məlumat əsasında aparılan araşdırma nəticəsində Azərbaycan Respublikası Cinayət Məcəlləsinin müvafiq maddələri ilə cinayət işi başlanıb.
Aparılan istintaq-əməliyyat tədbirləri ilə Zaur Babayevin özünü dövlət orqanının vəzifəli şəxsi kimi təqdim edərək ayrı-ayrı vaxtlarda cəzaçəkmə müəssisəsində saxlanılan təqsirləndirilən şəxsin cəzasının azaldılmasına, mənzilin özəlləşdirilməsinə və pensiya təyin edilməsinə köməklik göstərilməsinə dair yalan vədlər verərək guya səlahiyyətli vəzifəli şəxslərə verilməsi adı altında müxtəlif şəxslərdən ümumilikdə 40 min manat pul vəsaitini alaraq dələduzluq etməsinə və vətəndaşları vəzifəli şəxs tərəfindən bilə-bilə qanunsuz hərəkətlər etməyə görə rüşvət verməyə təhrik etməsinə əsaslı şübhələr yaranıb.
Ona qarşı Cinayət Məcəlləsinin 310 (vəzifəli şəxsin səlahiyyətlərini mənimsəmə), 32.4, 312.2 (vəzifəli şəxs tərəfindən bilə-bilə qanunsuz hərəkətlər etməyə görə ona rüşvət verməyə təhrik etmə) və dələduzluq maddələri ilə ittiham elan edilib.
Mərhəmət Hüseynov isə dələduzluqda suçlanır.
Əldə etdiyimiz məlumata görə, Mərhəmət Hüseynov həyat yoldaşı həbsdə olan bir qadını tanıyıb. Həmin qadın həbsdə olan ərinin cəzasının azaldılmasına kömək edilməsini istəyirmiş.
Mərhəmət Hüseynov da bu haqda Zaur Babayevə deyib.
Zaur Babayev “bu iş mənlikdir” deyərək zərərçəkmiş kimi tanınan qadından pul alıb. Sonradan onun dələduzluq əməli üzə çıxıb.
Özünü DTX mayoru kimi təqdim edən Zaur Babayevi bir çoxları belə tanıyırmış. İş alınmadığı zaman qadın Mərhəmət Hüseynovdan şikayətçi olub. Mərhəmət Hüseynov saxlanılan zaman Zaur Babayevin adını çəkib və işin üzrə belə açılıb.
