Gürcüstan və Azərbaycan arasında dostluq və əməkdaşlıq münasibətləri inkişaf etməkdə davam edir.
Prezident İlham Əliyev Gürcüstana ümumilikdə 10 dəfə səfər etmişdir. Bunlardan biri dövlət səfəri, biri rəsmi və digər yeddi səfəri isə işgüzar olmuşdur.
Bütün bunlar iki ölkənin mehriban qonşuluq və tarixi dostluq əlaqələri, siyasi, iqtisadi, humanitar və digər sahələrdə strateji tərəfdaşlıq əlaqələrinin sübutudur. 1996-cı il martın 8-də imzalanan “Azərbaycan Respublikası ilə Gürcüstan arasında dostluq, əməkdaşlıq və qarşılıqlı təhlükəsizliyin möhkəmləndirilməsi haqqında Müqavilə” müqavilə strateji tərəfdaşlığın təməlini qoyan sənəddir.
HəmçininAzərbaycan-Gürcüstan münasibətləri daim yüksək səviyyədə olmuşdur. Dövlətlərarası əlaqələrimizin zəngin tarixə malikdir. Bu ölkələr arasında diplomatik münasibətlər 1992-ci il 18 noyabrda qurulmuşdur. 2022-ci ildə bu münasibətlərin 30-ci ildönümü qeyd olunur. Azərbaycan-Gürcüstan əlaqələri qarşılıqlı hörmət və etimad üzərində qurulmuşdur və ötən illər ərzində dinamik şəkildə inkişaf etmişdir.Ölkələr arasında siyasi, iqtisadi, enerji, humanitar və digər sahələrdə səmərəli əməkdaşlıq formalaşmışdır.
Ümummilli lider Heydər Əliyevin və Prezident Eduard Şevardnadzenin dostluq münasibətləri əlaqələrin inkişafına əhəmiyyətli təkan vermişdir. Ötən illər ərzində ali və yüksək səviyyədə çoxsaylı qarşılıqlı səfərlər baş tutmuş, indiyədək 118-dən çox sənəd imzalanmışdır. Gürcüstanın Azərbaycanda səfirliyi 1995-ci ildə açılmışdır. 1996-cı ildə isə Azərbaycanın Gürcüstanda səfirliyi fəaliyyət göstərməyə başlamışdır. Eyni zamanda 2009-cu ildə Azərbaycanın Gürcüstanın Batumi şəhərində Baş Konsulluğu, 2013-cü ildən başlayaraq isə Gəncə şəhərində Gürcüstanın Baş Konsulluğu açılmışdır.
Ölkələrin parlamentlərarası əlaqələri də fəal şəkildə davam etdirilməkdədir. Hər iki ölkənin qanunverici orqanında dostluq və işçi qrupları fəaliyyət göstərir.
Azərbaycanla Gürcüstan arasında beynəlxalq təşkilatlar çərçivəsində də qarşılıqlı dəstək təcrübəsi mövcuddur. BMT Baş Assambleyasının 2020-ci il sentyabrın 3-də, 2021-ci il iyunun 17-də və 2022-ci il iyunun 8-də keçirilmiş sessiyalarında “Abxaziya (Gürcüstan) və Cənubi Osetiyadan (Gürcüstan) məcburi köçkün və qaçqınların vəziyyəti barədə” qətnamələrə dair səsvermə zamanı Azərbaycan sözügedən sənədin lehinə səs verib.
Gürcüstanın dövlət və hökumət başçıları, müxtəlif rəsmi nümayəndə heyətləri ölkəmizə mütəmadi səfərlər etmişlər. Gürcüstan Baş nazir İrakli Qaribaşvili 2021-ci il sentyabrın 29-da ölkəmizdə səfərdə olmuşdur. 2022-ci ildə də ölkələrimiz arasında intensiv yüksək səfərlər baş tutmuşdur.
Hazırda Azərbaycan ilə Gürcüstan arasında iqtisadi sahədə münasibətlər yüksək səviyyədədir. İqtisadi əməkdaşlıq məsələləri üzrə birgə Hökumətlərarası Komissiya 2004-cü ildən etibarən fəaliyyət göstərir.
Gürcüstanın paytaxtı Tbilisi şəhərində Ümummilli Lider Heydər Əliyevin adını daşıyan böyük küçə, park və abidə vardır. Azərbaycanlılara aid Heydər Əliyev adına Tbilisi Dövlət Peşəkar Azərbaycan Dram Teatrı, “ERA Teatrı” və yeni yaradılmış “Beez” uşaq teatrı, M.F.Axundzadə adına Azərbaycan Mədəniyyəti Muzeyi fəaliyyət göstərir. Bu muzey M.F.Axundzadənin, C.Məmmədquluzadənin və N.Nərimanovun ev-muzeylərini özündə birləşdirir.
Fatimə Talıbzadə Astan. Azərbaycan Dövlət Pedaqoji Universiteti
