O, 1931-i ildə Samsunun Çarşamba ilçəsində avar kökənli ailədə doğulub. Babası Şeyx Şamilin silahdaşı olub və məğlubiyyətdən sonra Türkiyəyə köçüb. Mustafa kiçik yaşlarından karakucak güləşi ilə məşğul olub, idman güləşinə isə hərbi xidmətdə başlayıb. Ordudan sonra məşhur güləşçi, 1948-ci ilin olimpiya çempionu Yaşar Doğunun yetirməsi olur.
Həmin dövrün bir çox güləşçiləri kimi Mustafa Dağıstanlı da həm sərbəst, həm yunan-roma güləşi ilə məşğul olurdu. Yunan-roma güləşində 1955-ci ildə Aralıq dəniz oyunlarında qızıl medal qazanıb. Amma daha böyük uğurları sərbəst güləşlə bağlıdır.
Mustafa Dağıstanlı sərbəst güləş üzrə keçirdiyi 393 qarşılaşmanın 389-da qələbə qazanıb, dörd qarşılaşma heç-heçə bitib. O, üç dəfə dünya çempionu, bir dəfə dünya kubokunun sahibi, bir dəfə Balkan çempionu olub.
İlk dəfə iştirak etdiyi olimpiya oyunlarında bütün rəqiblərini, o cümlədən İranı təmsil edən azərbaycanlı Mehdi Yaqubini finalda məğlub edən Mustafa olimpiya çempionu adını qazanır. O, 1960-cı ildə öz uğurunu təkrar edir. Bu dəfə finalda bolqar Stanço Kolevi məğlub edir.
Mustafa Dağıstanlı başqa bir güləşçi Mithat Bayraqla birlikdə iki dəfə olimpiya çempionu olan ilk Türkiyə idmançılarıdır. O bir dəfədən artıq olimpiya çempionu olan beş türkiyəlidən biridir.
1960-cı ildə idmanı tərk edən Mustafa Dağıstanlı bir müddət bizneslə məşğul olub. 1973-1980-ci illərdə isə Süleyman Dəmirəlin başçılıq etdiyi “Ədalət” partiyasından Samsun millət vəkili seçilib. Hərbi çevrilişdən sonra siyasəti buraxdı.
Bu il aprelin 11-də 90 yaşını qeyd edən Mustafa Dağıstanlı Ankarada yaşayır.
Yadigar Sadıqlı
