Ali Baş Komandan İlham Əliyev fəaliyyətində əsas istiqamətlərdən biri də şəhidlərin adlarının əbədiləşdirilməsi və təbliğidir. Ölkə başçısı bütün çıxışlarda məmurlara bu həssas məsələni diqqətdə saxlamağı tapşırır.
Lakin bəzən bu diqqət və qayğını əsirgəyən, şəhidin ruhuna və ailəsinə hörmətsizlik edən qurumlar və məmurlar da tapılır. Şəhidin ruhuna hörmətsizlik edən icra strukturundan biri də Lerik rayon İcra hakimiyyəti və rayon Təhsil şöbəsidir.
Adıçəkilən bu qurumların səlahiyyətli şəxsləri sanki, şəhid adına hörmətsizlik etməkdən həzz alırlar. Əgər belə olmasaydı 2 ilə yaxın müddətdə şəhidin ailə üzvlərinin maddi dəstəyi ilə hazırlanan büstünün məktəbin həyətinə qoyulmasına şərait yaradardılar. Dəfələrlə edilən şifahi və yazılı müraciətlərə baxmayaraq, şəhidin büstünün məktəbin həyətində ucaldılmasına icazə verilmir.
Lerik rayon İcra Hakimiyyətinin hərəkətlərində bir məntiqsizlik də höküm sürür. Belə ki, ucqar dağ kəndi olan Vizəzəmin orta məktəbi uzun illərdir şəhid Əbülfət Musayevin adını daşıyır. Bu gün isə rayon icra hakimiyyəti həmin məktəbin həyətində şəhidin abidəsinin ucaldılmasına icazə vermir və məsələni qanunlarla tövsüv etməyə çalışır. Bu məntiqsizlik deyil, nədir?!
Xatırlatma üçün qeyd edək ki, Vətənimizin azadlığı və suverenliyi uğrunda gedən döyüşlərdə şəhid olmuş Musayev Əbülfət Nəsirulla oğlu da Lerik rayon Sipyəreğon kəndində doğulub, boya-başa çatıb. Vətənpərvərlik ruhunda böyüdülən Əbülfət Musayev ölkəmizə qarşı işğalın qarşısını almaq, ərazilərimizin azad olunması üçün silaha sarılaraq, döyüşlərə atılıb. Qarabağ savaşı başlananda könüllü olaraq ordu sıralarına qoşulub. Əbülfətin döyüş yolu Qarabağ cəbhəsinin müxtəlif istiqamətlərindən keçir. 1993-cü ildə Fizuli rayonu uğrunda gedən döyüşlərdə iştirak edir və hər zaman öz döyüş bacarığı ilə seçilir. 1994-cü il yanvar ayının 12-də Fizuli rayonu uğrunda gedən döyüşlərdə qəhrəmancasına şəhid olub. Şəhidin cənazəsi doğulduğu kəndə gətirilərək torpağa tapşırılıb.
Əbülfət Musayevin adının əbədiləşdirilməsi üçün hökumətimiz əhəmiyyətli addım atıb. Azərbaycan hökumətinin müvafiq qərarı ilə şəhidin təhsil aldığı Vizəzəmin kənd orta məktəbi onun adını daşıyır. Bütün kənd sakinləri şəhidimizin büstünün Vizəzəmin kənd orta məktəbinin qarşısında – həyətində qoyulması təşəbbüsü ilə çıxış etsə də, nədənsə Lerik rayon İcra Hakimiyyəti uzun müddətdir buna icazə vermir.
Xatırladaq ki, büst-abidə şəhid Əbülfət Musayevin qardaşları tərəfindən hazırlatdırılıb. Amma Lerik rayon İcra hakimiyyəti bu büstün məktəb qarşısında qoyulmasını əngəlləyir. Görünən odur ki, isti kabinetlərindən, bahalı kreslolarından durmağı özlərinə sığışdırmayan bu məmurcuqlar şəhidin ruhundan qisas alırlar. Ümid edirik ki, Lerik rayon İcra hakimiyyətinin özündənrazı məmurları bu məsələni tezliklə həll edəcəklər.
