“Evdəki rahatlığı, səmimiyyəti heç vaxt restoran əvəz edə bilməz”
Bir neçə dəfə müsahibə üçün vədələşsək də, lakin müəyyən texniki səbəblərdən, eləcə də gərgin iş rejimindən dolayı deputat Jalə Əhmədova ilə görüşüb “Deputat vaxtı” rubrikası üçün söhbətləşməyə zaman olmurdu. Nəhayət ki, Milli Məclisin yay tətilinə çıxmasından istifadə edib millət vəkili ilə görüşməyə nail olduq. Onu da qeyd etmək lazımdır ki, parlamentin yay tətilinə çıxmasına baxmayaraq əksər deputatlar kimi Jalə Əhmədovanın gərgin iş rejimi o qədər də azalmayıb. Elə müsahibə üçün təyin etdiyimiz məkana da birbaşa deputat seçildiyi rayondan, Salyandan seçicilərlə görüşdən gəlirdi. Kifayət qədər səmimi, mehriban bir millət vəkili olduğunu Salyandakı seçicilərindən, bu rayonda yaşayan tələbə yoldaşlarımdan da eşitmişdim. İlk dəfə görməsinə baxmayaraq mənimlə yaxın qohum-əqrəba kimi hal-əhval tutması ilə eşitdiklərimin əyani şahidi oldum. Beləliklə, səmimi, mehriban, eyni zamanda işgüzar xanım olan deputat Jalə Əhmədova ilə “Deputat vaxtı”nda söhbətləşdik.
-Jalə xanım, əvvəla məlumat verim ki, “Deputat vaxtı” rubrikamız bir növ siyasətdən kənar mövzular üzərində qurulur. İlk sualım belədir, Milli Məclisin deputatı olmaq Jalə Əhmədovada nələrisə dəyişdimi? Bir qədər də konkretləşdirək deputat olandan sonra həyatınızda nələri dəyişmək məcburiyyətində qaldınız? Yoxsa həyat öz axarı ilə gedir?
-İstər-istəməz müəyyən həyat tərzində təbidir ki, dəyişiklik olur. Əvvəl adi vətəndaş kimi yaşayır və vətəndaş kimi məsuliyyət daşıyırsansa, deputat seçiləndən sonra bu məsuliyyət daha da artır. Nəticə etibarilə əvvəlki həyat tərzində hansısa bir məhdudiyyətlər yaranır. Çünki artıq siz cəmiyyətdə bir nümunəsiniz, ona uyğun hərəkət etməlisiniz. Ümumilikdə götürsək çox bir şey də dəyişməyib. Mənim fəaliyyətimi, xüsusilə Milli Məclisin deputatı seçilən müddətə qədər olan dövrü izləsəniz görəcəksiniz ki, həmişə fəal olmuşam. İstər sosial, istər gənclərlə iş, istərsə də idman sahəsində həmişə fərd, vətəndaş olaraq aktivlik nümayiş etdirmişəm, qeyd edilən istiqamətlərdə müəyyən işləri görmüşəm. Yuxarıda da qeyd etdiyim kimi deputat olandan sonra isə məsuliyyət on dəfə artır. Artıq həm seçildiyiniz dairənin, həm də Azərbaycan Parlamentinin təmsilçisi kimi məsuliyyət daşıyırsınız. Bir qədər də konkretləşdirsək dəyişən ən çox məsuliyyət məsələsidir. Artıq siz cəmiyyət, vətən, millət üçün yaşayırsınız, özünüzü bir növ unudursunuz.
-Bu tendensiya, daha çox cəmiyyətə, seçicilərə bağlılıq ailədə problemlərin, qısqanclıqların meydana çıxmasına səbəb olmur?
-Mən bu yola çıxmamışdan əvvəl təbiidir ki, ailəmlə məsləhətləşmişdim. Bunu bir neçə dəfə də müsahibələrimdə vurğulamışam. Mənim həyatda ən böyük dəstəkçim, ən böyük dostum, məsləhət yerim həyat yoldaşım olub. Bu hər zaman belədir. Açığı deyim onun həyat təcrübəsi də məndən çoxdur. Ona görə də mən bilmədiyim bir sıra nüansları mənə yoldaşım aşılamışdı. Deyirdi ki, bu kimi problemlərlə, çətinliklərlə üzləşəcəksən, vaxt məhdudiyyəti olacaq və s. Məsələnin müsbət tərəfi ondan ibarətdir ki, artıq övladlarım da böyükdür, özləri öz ayaqları üstündə dayana bilirlər. Hətta bacardıqları sahədə mənə dəstək olurlar. Düzdür, seçici problemləri, parlament iclasları, digər konfrans və toplantılar səbəbindən onlarla keçirdiyim zamandan, vaxtdan kəsməli oluram. Çox şükür ki, bu da ailəmizin hər bir üzvü tərəfindən anlayışla qarşılanır və mənə dəstək olurlar. Ona görə də hansısa bir problem, qısqanclıq büruzə verilmir. Çünki ailəmin hər bir üzvü yaxşı bilir ki, millət vəkili şərəfli bir işdir və onun öhdəsindən layiqincə gəlmək lazımdır. Mandat qazanmaq olar, amma onun yükünü daşımaq, sənə göstərilən etimadı doğrultmaq şərəfli bir işdir. Ona görə də ailəm mənə fəaliyyətimdə çox böyük dəstək verir.
-Bu gün çoxları zaman azlığından, zamanın, vaxtın tez keçdiyinidən, gündəlik nəzərdə tutduğu planları həyata keçirə bilmədiyindən gileylənir. Bəs, deputat Jalə Əhmədova necə, zaman qıtlığı problemi və nəzərdə tutduğu görüşləri, toplantıları, planları həyata keçirə bilməmə kimi mənfi tendensiya ilə üzləşirmi?
-Hesab edirəm ki, həyatda hər şey nizam-intizamla tənzimlənir. Əgər insan hər bir şeyə məsuliyyətlə yanaşırsa mənə elə gəlir ki, zaman, vaxt tapmaq olur. Sadəcə olaraq, hər şeyə yanaşma düzgün, planlı şəkildə olmalıdır. Deputat olduğum bir il yarım müddətdə nəyəsə vaxt tapa bilmirəm, nəyəsə çatdıra bilmirəm desəm yalan olardı. Yəni, belə bir problemlə üzləşmirəm. Hər bir işimi öncədən planlaşdırıram. Bilirəm ki, hansı gün hansı işi görməliyəm. və həmin planla da gedirəm. Məncə zamanım yoxdur sözü, insanın özü üçün qurduğu bir bəhanədir. Əslində insan çox-çox, həddindən artıq böyük işlərə qadirdir, özündə bilmədiyi çox böyük güc var. İnsan çətinliyə düşəndə həmin gücünü bilir və əmin olur ki, doğurdan da mən bunu edə bilərəm. Bir sözlə mənə elə gəlir ki, insan hər şeyə qadirdir. İstədiyi vaxtda hər kəsə, hər şeyə vaxt tapmaq olur.
-Maraqlıdır, deputat Jalə Əhmədovanın gündəlik daha çox zamanı nəyə sərf olunur?
-Adətən səhər bir qayda olaraq ölkədə və dünyada baş verən xəbərlərlə tanış oluram. Çünki bizim vəzifəmiz elədir ki, hər bir şeydən xəbərdar olmalıyıq. İlk olaraq günümüz bununla başlayır. Sonra isə başlayırıq vətəndaşların problemləri, şikayət və müraciətləri ilə maraqlanmağa, bizə daxil olan seçici məktublarını incələməyə. Deyərdim ki, günümüzün ən çox vaxtı vətəndaşa, sosial sahəyə sərf olunur. Bütün bunları yekunlaşdırandan sonra isə təbidir ki, öz ailəmizə zaman ayırırıq. Artıq bir il yarımdır ki, məndə gündəlik standart belə davam edir.
-Bildiyimiz qədər idmana da bağlılığınız var və 2018-ci ildən Vinq Çun döyüş sənəti federasiyasının təsisçisi və I-ci vitse-prezidentisiniz. Yəqin özünüz də həmin idman növü ilə məşğul olmusunuz və bu idman növündə hansısa nailiyyətləriniz varmı?
-Vinq Çun döyüş sənəti ilə məşğul olmuşam. Həmçinin həmin döyüş növü üzrə Federasiyada təmsil olunmuşam. Amma bir professional idmançı kimi yox, həvəskar olaraq. Bu sahədə hansısa nailiyyətlərim də olmayıb. Ümumiyyətlə, həyat boyu hər şeyə marağım olub. Hər şeydən az-az məşğul olmuşam. Həyatımı standart, şablon yaşayışla heç vaxt sürdürməmişəm. Həmişə nə iləsə maraqlanmışam. Vinq Çun döyüş sənəti ilə də həmçinin. Maraqlandım və məlumatım oldu ki, Azərbaycanda Asif Sayadov bu döyüş növü ilə məşğul olur. Həmin döyüş növünü Asif Sayadov Azərbaycana gətirib, onu inkişaf etdirib. Beləcə Asif Sayadovla görüşüb həmin idman növü ilə məşğul olmağa başladıq. Atam, mən, övladlarım, yoldaşım, demək olar ki, hamımız bu idmanla məşğuluq. Sadəcə olaraq onlardan mən daha aktiv oldum. Təbii ki, bu da artıq xarakterdən irəli gəlir. Tədricən Federasiyanın nə kimi problemlərinin olduğu ilə maraqlanmağa başladım. Onu da qeyd edim ki, həmin vaxt federasiya deyil, klub olaraq fəaliyyət göstərirdi. Beləliklə, başladıq həmin idman növünü daha çox inkişaf etdirməyə. Mənə qədər də Asif müəllim çox böyük işlər görmüşdü, sözügedən idman növü üzrə dünya Assosasiyalarının rəhbərinin iki dəfə Azərbaycana səfərini reallaşdırmışdı. Həmçinin Azərbaycanda böyük çempionatlar təşkil edirdi. Mən də öz növbəmdə dəstək verdim.
-Həmin idmanla həvəskar kimi məşğul olduğunuz halda federasiyaya daha geniş dəstək vermək nədən irəli gəlirdi və məqsəd nə idi?
-Çünki, günümüzdə gənclərin düçar olduğu problemlər hamımıza bəllidir. Narkomaniya baş alıb gedir. Həqiqətən bu bir reallıqdır. Təkcə Azərbaycanın deyil, bütün dünyanın reallığıdır. Gəncləri bu kimi problemlərdən uzaqlaşdırmağın isə iki yolu var. Biri, təhsildir, digəri də idman. Özüm də həmin idmanla məşğul olduğum üçün düşünürdüm ki, gənclərə şərait yaradıb, idmanı inkişaf etdirmək daha çox önəmli olardı.
Mənim Federasiyada daşıdığım funksiya ondan ibarət olurdu ki, gənclərlə bir ana kimi davranım. Ola bilir ki, yaşla əlaqədar evdə valideyn uşağa hansısa bir sözü deyəndə uşaq müəyyən mənada valideynlə razılaşmır. Ancaq Federasiyada müəllim, məşqçi, Jalə Əhmədova nə isə deyəndə uşaq onu pis qəbul etmir, ona əməl edir. Ona görə də biz də çalışırdıq ki, uşaqlara bu baxımdan dəstək olaq. Bir sözlə uşaqlara əsasən psixoloji dəstək verməyə çalışırdım. Yəni funksiyam ondan ibarət idi.
-Deputat fəaliyyəti Sizi idmandan kənar qoymayıb?
-Pandemiya dövründə idman zalları bağlı idi və ona görə də bir az idmandan uzaqlaşdıq. Həm də elə bir dövrə təsadüf elədi ki, yeni deputat seçilmişdim və artıq özümlə yox, vətəndaşlarla məşğul olurdum. Hazırda idman zallarımız açılıb, yenə də mütəmadi olaraq bu idman növü ilə məşğul olmağa davam edirəm.
-Jalə Əhmədova azsaylı deputatlardan sayıla bilər ki, seçiciləri ilə görüşləri müntəzəm və saatlarla davam edir. Və bir məqamı da qeyd edək ki, siz seçicinin narazı qaldığı dövlət qurumunun birbaşa adını qeyd edib hədəf göstərirsiniz. Bu Sizi təzyiq qarşısında qoymur?
-Desəm ki, yox olmur, bu yalan olar. İnsanlarımızın əksəriyyətində belə yanaşma var ki, əgər kiminləsə bağlı hansısa haqlı bir iradı bildirirəmsə, artıq mənimlə düşmən mövqedə olur və irad bildirilir ki, niyə mənim adımı çəkdiniz və s. Ancaq bir məqamı da qeyd etməliyəm. Mən nəyisə, hansısa problemi açıq-aşkar qeyd etməmişdən əvvəl həmin quruma, onun rəhbərliyinə problemlərin, şikayətlərin olduöu barədə məlumat verirəm. Bir növ əvvəl özlərinə şans verirəm ki, qaldırılan problemləri aradan qaldırsınlar. Görəndə ki, bir dinamika, dəyişiklik yoxdur, o halda həmin şikayət olunan qurumun adını çəkmək, onu sosiallaşdırmaq məcburiyyətində qalıram. Çünki mənim işim bundan ibarətdir, məni bunun üçün seçiblər ki, biz vətandaşla dövlət qurumları arasında körpü olaq. Bizə dövlətimiz tərəfindən o səlahiyyət verilib ki, biz həmin qurumlara vətəndaşın səslərini çatdıra bilək. Tam səmimi deyəcəm, heç kəsdən bir asılacağım, heç kəsdən bir umacağım olmadığı üçün rahat sözümü deyirəm. Camaatımın, xalqımın, məni seçib etibar edən insanların problemlərini rahat qabardıb deyə bilirəm. Ola bilər ki, buna görə kimsə məndən incisin, hansısa bir qurum narazı qalsın, hansısa bir təziq göstərilsin. Mənim üçün heç bir problemi yoxdur. Zaman, vaxt hər şeyi özü tənzimləyir. Həmin insanda qəlbinin dərinliyində özü çox gözəl bilir ki, problem özündədir. Yəni o özü başa düşür ki, Jalə Əhmədova nəyisə heç vaxt nahaqdan demir. Razılaşmasalar da, amma özləri bilirlər. Demişəm, həmişə də deyəyəcəm. Təziqlərlə yaşasaq onda gərək işləməyək.
-Hesab edirəm ki, bu həm də seçici problemini həll etməyə yönəlik prinsipiallıqdan irəli gəlir. Belə çıxır ki, həyatda da prinsipial adamsınız?
-Bəli, birmənalı. Çünki, bu postun vəzifə səlahiyyətləri, vəzifə borcları var. Millət vəkilinin adı üstündədir. Millətin vəkili. Digər tərəfdən bildiyiniz kimi mən həm də hüquqşünas kimi və həmişə vətəndaş problemi ilə məşğul olmuşam. Fərd olaraq kiminsə hansısa problemi ilə məşğul olmuşam ki, onun hüququ tapdalanmasın. İndi də eyni proses davam edir. Deputat da vətəndaşın hüququ üçün çalışır. Əgər vətəndaşın vəzifə borcunu yerinə yetirməyəcəyiksə, onda o vəzifəni tutmaq bir anlamsızdır. Mən bu beş ilimi yalandan yola vermək istəmirəm. Mən öz şəxsiyyətimə heç vaxt sığışdırmaram ki, beş ildən sonra yenidən deputat seçilmək üçün vətəndaşa yalvar-yaxar edim. Yəni o mümkün deyil. Beş ildə elə işləyib vətəndaşı öz fəaliyyətimlə razı salmalıyam ki, növbəti seçkidə vətəndaş özü mənim yenidən deputat seçilməyim təşəbbüsü ilə çıxış etsin. Bir sözlə seçici özü məni seçməlidir. Bir məqamı da qeyd edim ki, mən seçki dövründə camaata heç vaxt heç nə vəd etmədim. Həmişə deyirdim ki, nəyi bacarıramsa, nəyə gücüm çatırsa onu da edəcəm. Beş ildən sonra da onun nəticəsi olmalıdır. Ona görə də vətəndaş mənafeyinin qorunması, onun problemlərinin araşdırılıb öz həllini tapması məsələsində konkret olaraq güzəşt yoxdur. Məhz prinsipial mövqe tuturam.
-Bəs güzəşt etməyi necə, bacarırsınız? Yaxud, vətəndaş Jalə Əhmədova üçün nədə güzəşt olmamalıdır. Yəni hansı məsələ, mövzu ola bilər ki, bu halda heç bir güzəştə getmirsiniz?
-Namus məsələsində heç vaxt güzəştə getmərəm və bu mənim üçün çox önəmlidir. Eyni zamanda ədalət məsələsində, laqeydlik məsələsində güzəştə getmərəm. İnsanıq, səhv hamıda ola bilər. Ola bilər ki, hansısa məsələ, yaxud iş unutqanlıqdan irəli gələrək yaddan çıxa bilər. O zaman güzəşt eləmək olar. Amma həmin problemin həlli laqeydlikdən, məsuliyyətsizlikdən irəli gəlirsə, heç vaxt ona güzəşt ola bilməz. Eyni zamanda başqasının hüququnu tapdalayan adama qətiyyən güzəşt edə biilmərəm.
Çünki göydə, başımızın üstündə Allah var. Bu gün camaatıma, millətimə hesabat verəcəmsə, beş ildən sonra vaxt gələcək Allahımıza hesabat verəcəyik. Sabah mən sorğu-sual olunacam. Mən Allahıma çox inanan adamam. Eyni zamanda mən möhtərəm Prezidentimin qarşısında məsuliyyət daşıyıram. Dediyim kimi həyatda prinsiplərim var. Ədalət hissidir, başqasının hüququna toxunmamaq hissidir. Çünki, hər kəsin qəlbi, hər kəsin yarası, hər kəsin öz problemləri var.
-Nəyəsə xüsusi marağınız, hobbiniz varmı?
-Konkret olaraq deyim ki, nəyəsə hobbim var, bu doğru olmazdı. Bu da xasiyyətimdən irəli gəlir. Ümumiyyətlə hər bir şeyə marağım var. Bu gün idmana meyl edə bilərəm, sabah bir başqa peşə ilə məşğul olaram. Konkret olaraq nəyəsə, hansısa bir sahəyə meylim var deməzdim. Ən çox sevdiyim iş isə kitab oxumaqdır. Kitab oxumaq mənə elə bil mənəvi rahatlıq verir. Beynim dincəlir, müəyyən problemlərdən uzaqlaşıram.
-Bildiyimiz qədər ailəlisiniz və iki övladınız var. Allah saxlasın hər birini. Övladlarınız daha çox sirrlərini sizinlə bölüşür, yoxsa ataları ilə?
-Biz övladlarımızla yaxın dostuq. Ataları ilə istər-istəməz aralarında pərdə var. Amma oğlan uşaqları olmalarına baxmayaraq əvvəldən onlarla yaxın dost olmuşuq. Çünki, mən öz valideynlərimdən bunu görmüşəm, Həyatda ən yaxın dostum, sirdaşım həmişə mənim atam olub. O münasibətin bəhrəsini gördüyümə görə o dostluq münasibəti mənə həyatda çox böyük dəstək olub. Gənc oluruq hansı səhvlərə meyilli oluruqsa həmin səhvlərdən məni o dostluq qoruyub. İndi arxama dönüb baxanda alnı açıq, üzü ağam, rahatam. O da mənim valideynimin hesabınadır. Mən də övladlarımla da o münasibəti qurmuşam. Yəni uşaqlarla çox mehribanıq, aramız yaxındı, dostuq, sirlərini, söhbətlərini çəkinmədən mənimlə bölüşürlər. Əvvəldən onlara demişəm ki, mən və ataları kimi onlara həyatda hansısa yolu göstərə biləcək ikinci adam yoxdur. Biz onları səhvləri ilə də, düzləri ilə də qəbul edirik. Çox şükür ağılları başlarında olan, zəhmətkeş uşaqlardır, bizə bu günə qədər də bir problem yaratmayıblar. Hətta çox yerdə analarının deputat olduğunu gizlədirlər və adi vətəndaş kimi öz həyatlarını yaşayırlar.
-Bəs onlara istədiyiniz qədər vaxt ayıra bilirsinizmi?
-Bacardığım qədər bunu etməyə çalışıram. Eyni zamanda onlar da yaxşı başa düşürlər ki, deputat işi nə qədər məsuliyyətli və gərgin işdir. Seçici probleminin həlli, seçici məmnunluğu hər şeydən üstündür.
-Mətbəx işlərini sevirsiniz? Yeməkləri özünüz hazırlayırsınız?
-Mətbəx məndə müqəddəsdir. Mətbəxdə özüməm və mətbəx işləri özümlə bağlıdır. Onu da deyim ki, buna xüsusi həvəsim də var. Evimə gələn qonaqlar üçün süfrəni özüm hazırlayıram.
-Qonaqlarınız çox olur? Sevirsiniz qonaq gəlməyi?
-Bəli, qonaq gəlməyi çox sevirəm. Biz həyət evində yaşayırıq və xüsusilə qonaq-qaranın olmasını çox sevirəm. Əvvəldən, atamgilin dövründən biz belə görmüşük. Həmişə evimiz qonaq-qaralı olub. Qonağı restoran və ya kafedə qəbul etməyi sevmirik. İndi bir çoxları qonağı restoranlarda qəbul etsə də, ancaq biz yox, belə etmirik. Evdəki rahatlığı, səmimiyyəti heç vaxt restoran əvəz edə bilməz. Dədə-babadan necə görmüşüksə həmin adətlə də gedirik. Evimizə gələn-gedən olanda bizə xoş olur. Sevinirik ki, kimsə gəlsin. Bir də bu mənə qaynanamdan keçmədir. Qaynanam həmişə deyir ki, evin qapısını qonaq açmasa o evə ruzi gəlmir. Allah da gələn qonağın ruzisini özündən qabaq göndərir.
-Jalə xanım, Milli Məclis yay tətilinə çıxmasına baxmayaraq bizi vaxt edib elə parlamentdə qəbul etdiyiniz və səmimi söhbətinizdən dolayı təşəkkür edirəm
-Mən sizə təşəkkür edirəm. Fürsətdən istifadə edib Milli Mətbuat Günü münasibıti ilə redaksiyanızın rəhbərliyini, sizi, eləcə də kollektivinizi təbrik edir, yaradıcılıq uğurları arzulayıram. Ümumiyyətlə, yaxşı insanların hamısına uğur arzulayıram. Təkcə bir deputat deyil, eləcə də vətəndaş kimi həmişə mənə müraciət edən, qapımı açan insanlara əlimdən gələn hər hansı dəstəyi verməyə canla-başla hazıram. Təki bilək ki, kiməsə dəstəyimiz, köməyimiz dəyib, kiminsə hansısa bir yaxşı işində, inkişafında az da olsa bizim də payımız olub və bundan yalnız şərəf duyarıq.
