İsrail prezidenti İshak Hersoq İranın Rusiyaya döyüş pilotsuz təyyarələri verdiyini sübut etmək üçün ABŞ-la kəşfiyyat məlumatı mübadiləsi aparıb və Tehranın hərəkətlərinə sərt cavab verməyə çağırıb.
Alp.az “Amerikanın səsi”nə istinadən xəbər verir ki, ABŞ və Avropa Birliyi artıq oxşar nəticəyə gəliblər, lakin İsrail Qüdsə ən böyük təhlükə hesab etdiyi İrana qarşı daha sərt addımlar atmağa çalışır.
Vaşinqtona səfəri zamanı İshak Hersoq ABŞ-ın dövlət katibi Entoni Blinkenlə danışıqlar aparıb. Bu gün gün isə o, prezident Co Baydenlə görüşəcək.
“İran silahları dünyamızın sabitliyini pozmaqda əsas rol oynayır və beynəlxalq ictimaiyyət bundan indi və gələcəkdə dərs almalıdır”, – Hersoq deyib.
İsrail prezidenti bildirib ki, dünya İranla eyni dildə danışmalıdır – sərt, vahid və barışmaz şəkildə.
Hersoqun ofisindən verilən məlumata görə, Ukraynada vurulan pilotsuz təyyarələrlə dekabrda Tehran tərəfindən sınaqdan keçirilən pilotsuz təyyarələrin hissələri arasında oxşarlıqları göstərən şəkillər Vaşinqtonla paylaşılıb.
Blinken Hersoqla görüşün əvvəlində deyib ki, ABŞ və İsrail “İranın təhlükəli, sabitliyi pozan və terror aktlarına qarşı birlikdə dayanırlar”.
“Ukraynaya və xalqına qarşı növbəti təcavüz üçün Rusiyaya İran pilotsuz təyyarələrinin verilməsi həmin torpaqlarda dəhşətli nəticələr verir”, – deyə Blinken bildirib./Modern.az
