21 iyun 2021-ci ildə həbs edilən İŞİD-in Türkiyə lideri Kasım Gülərin 74 səhifəlik etirafı üzə çıxıb.
Alp.az xəbər verir ki, K.Gülər terror təşkilatının CHP sədri Kamal Kılıçdaroğlu, İstanbul Böyükşəhər Bələdiyyə sədri Əkrəm İmamoğlu və TV 8-in sahibi Acun Ilıcalıya qarşı hücum planlaşdırdığını, lakin bunu müxtəlif səbəblərdən həyata keçirilə bilmədiyini bildirib.
Ankara Baş Prokurorluğu İŞİD-in “Türkiyə Vilayəti”nə cavabdeh olduğu iddiası ilə həbs edilən “Əbu Usamə ət-Türki” kod adlı Kasım Gülərə qarşı iddia qaldırıb. İşin əlavələrində Gülərin 74 səhifəlik etirafları da var idi. Etiraflarda İŞİD-in Türkiyədə etdiyi və etməyi planlaşdırdığı hadisələrin təfərrüatları yer alıb.
Kasım Gülər İŞİD-in Kamal Kılıçdaroğlu, Əkrəm İmamoğlu və Acun Ilıcalı ilə yanaşı LGBT üzvlərinə, Kapadokiyada turistləri daşıyan hava balonları, Zöhre Ana Cemevi və Adanadakı İncirlik Hava Bazasına hücum planlaşdırdığını da bildirib.
Qeyd edək ki, 15 iyun 2021-ci il tarixində Milli Kəşfiyyat Təşkilatı (MİT) Suriyadan qeyri-qanuni yollarla Türkiyəyə keçmək istəyərkən terrora görə axtarışda olanlar siyahısında qırmızı kateqoriyada olan Kasım Güləri yaxalamışdı. Terror törətmək məqsədilə yanında gətirdiyi silahları və partlayıcıları müsadirə edilən Gülər 21 iyun 2021-ci ildə Ankara Ədliyyəsinə aparılaraq həbs edilib.
Kasım Gülər qayınatası vasitəsilə İŞİD ilə tanış olduqdan sonra 2008-ci ildə İslami Cihad Birliyi daxilində fəaliyyət göstərdiyini və Əfqanıstana getdiyini bildirib.Medianews.az
