İranın “Fərzad B” adlı qaz yatağının işlənməsini öz şirkətinə verməsi və öhdəliklərindən boyun qaçırması Hindistanla münasibətlərində qalmaqala səbəb olub. Alp.az xəbər verir ki, bu barədə məlumatı Hindistanın “Economic Times” qəzeti yayıb.
Bildirilir ki, iki ölkə arasında imzalanmış müqavilə əsasında “Hindistan Şirkətləri Konsorsiumu” İranın cənub sularında, Səudiyyə Ərəbistanı yaxınlığında neft və qaz yataqlarının kəşfiyyat işlərinə başlayıb.
85 milyon dollara başa gələn və 6 il davam edən kəşfiyyat işləri nəticəsində bölgədə “Fərzad B” də daxil olmaqla müxtəlif yataqlar aşkar edilib.
Anlaşmaya əsasən, kəşfiyyat işlərinin xərcləri tamamilə Hindistan tərəfindən ödənməli, İran tərəfi isə yataqların işlənməsində Hindistan şirkətlərinə 30% pay verməlidir.
2008-ci ildən Hindistanın ONGC şirkəti müqavilənin şərtlərinin həyata keçirilməsi üçün İranla danışıqlar aparıb, ancaq yataqların işlənməsi ilə bağlı müqavilənin imzalanması rəsmi Tehrana qarşı qəbul edilmiş sanksiyalar səbəbindən baş tutmayıb.
Ötən ilin may ayında isə İranın Milli Neft Şirkəti Hindistan Konsorsiumunun icazəsini almadan ümumi dəyəri 1.78 milyard dollar olan sözügedən yatağın işlənməsi ilə bağlı müqavilənin icrasını “Petropars” şirkətinə həvalə edib.
Hindistan rəsmiləri bildirirlər ki, 30% paydan başqa, Konsorsiumun yataqların işlənməsi üçün sərf etdiyi vəsaiti də İrandan alacaqlar.
Xatırladaq ki, İran Birləşmiş Ərəb Əmirliyi ilə bu ölkəyə Salman yatağından qaz ixrac etməklə bağlı imzaladığı müqaviləni də birtərəfli qaydada pozduğu üçün bu ilin sentyabr ayının 28-də 607 milyon dollar cərimələnib.
Bundan öncə də İran dəfələrlə oxşar addımlar ataraq xarici ölkələrlə imzaladığı müxtəlif müqavilələrə birtərəfli qaydada xitam verib. İndi Hindistan rəsmi Tehrana 3 gün vaxt verərək, məsələnin dərhal araşdırılmasını tələb edib.
