“Azərbaycan Silahlı Qüvvələrinin müxtəlif qoşun növləri üzrə 7 xüsusi təyinatlı hərbi birləşməsi Vətən Müharibəsində iştirak edib”.
Alp.az-ın məlumatına görə, bunu Azərbaycan Respublikasının Prezidenti İlham Əliyev Rusiyanın “Nasionalnaya oborona” jurnalının baş redaktoru, hərbi ekspert İqor Korotçenkoya müsahibəsində deyib.
Prezident bildirib ki, xüsusi təyinatlı qüvvələr ərazilərin işğaldan azad edilməsi əməliyyatında əhəmiyyətli rol oynayıb. Şuşa əməliyyatı da daxil olmaqla bir çox çətin döyüş əməliyyatlarını uğurla icra edən Müdafiə Nazirliyinin Xüsusi Təyinatlı Qüvvələrinin (XTQ) inkişafı, döyüş bacarığının artırılması istiqamətində görülən işlər onun diqqət və nəzarəti altında aparılıb.
İlham Əliyev xüsusi təyinatlıların müharibədə göstərdiyi döyüş bacarığını qəhrəmanlıq adlandırıb:
“Müharibədə Müdafiə Nazirliyinin Xüsusi Təyinatlı Qüvvələri ilə yanaşı, Dövlət Sərhəd Xidmətinin, Daxili Qoşunların, Hərbi Dəniz Qüvvələrinin, Dövlət Təhlükəsizlik Xidmətinin, Xarici Kəşfiyyat Xidmətinin, Naxçıvan Əlahiddə Ordusunun xüsusi təyinatlı hərbi birləşmələri iştirak edərək, qəhrəmanlıq nümayiş etdiriblər”.
Prezident xüsusi təyinatlı hərbi birləşmələrin müharibədə əlaqəli şəkildə döyüş apardığını və bu bacarığın təlimlərdə qavranıldığını da deyib.
İlham Əliyev döyüşlərdə qəhrəmanlıq nümayiş etdirən bütün hərbçilərin təltif edildiyini də qeyd edib.
İlham Əliyev: Vətən Müharibəsində Azərbaycan Xüsusi Təyinatlıları düşmənə sarsıdıcı zərbə vurdu
