Publika.az oxuculara Zəngilan döyüşlərinin iştirakçısı, Zəngilanın və Cəbrayılın azad olunması medalları ilə təltif olunmuş Vətən müharibəsi iştirakçısı Rəmzi Alıkişiyevlə söhbəti təqdim edir.
Əslən Ağdamdan olan Rəmzi Alıkişiyev iki il əvvəl Azərbaycan Ordusunun bölmələrinin Zəngilan istiqamətində həyata keçirdiyi ildırımsürətli döyüş əməliyyatlarından ağızdolusu və fəxarətlə danışır. Rəmzi deyir ki, Vətən Müharibəsinin elə ilk günü ona hərbi komissarlıqdan çağırış vərəqəsi gəlir:
“27 sentyabrda evimizə çağırış vərəqəsi göndərildi. 29 sentyabr tarixində isə xidmətə yollandım. Mənimlə bir gedən hərbi çağırışçılar öncə Mingəçevir şəhərində toplanışa cəlb edildik, daha sonra ən qaynar nöqtəyə – Füzuli istiqaqmətinə göndərildik”.
Həmsöhbətimiz danışır ki, onun döyüş yolu elə Füzuli istiqamətindən başlayıb:
“Burada çox qızğın döyüşlər gedirdi. Ən çox hərbçimiz məhz burada xəsarət almışdı. Şəhidlərimiz var idi. Daha sonra bizim istiqamət dəyişdirildi. Cəbrayıl istiqamətində irəlilədik. Cəbrayılın kəndlərini işğaldan azad etdikdən sonra, Zəngilana doğru hərəkətə başladıq. Cəbrayılla Zəngilan arasında Heyvalıq deyilən yer var, Arazqırağı bir ərazidir. Ordan Zəngilana qalxmışıq. Zəngilan istiqamətində ilk döyüşlərimiz elə buradan başlayıb”.
Rəmzinin döyüş yolu Mincivana qədər davam edir:
“Orda ermənilərin briqadası vardı. İlk hücumu ora etmişik, oradan ferma deyilən yerə keçdik. Daha sonra Mincivana doğru irəlilədik. Həmin qəsəbədə qızğın döyüşlər getdi. Biz düşmənin üzərinə getdikcə onlar Ördəkli kəndi istiqamətində qaçmağa başladı. Ördəklidən sonra dağlara qalxdıq. Bunun ardınca Zəngilan şəhərinin özünə doğru hərəkət etdik. Zəngilanın mərkəzində də şiddətli döyüşlər getdi. Şəhərə girəndə gördük ki, burada yaşayış olub. Sonrakı döyüşlərdə düşməni sərhədə qədər qovduq. Onlar Zəngilanla Ermənistanın sərhədindəki dağlara geri çəkildilər. Bu zaman silah-sursatı döyüş meydanında atıb, qabağımızdan qaçırdılar”.
