Türkiyə Prezidenti Rəcəb Tayyib Ərdoğan NATO Zirvə görüşündən dərhal sonra böyük heyətlə Qurtuluş Gününü qeyd edən Azərbaycana səfər edib.
Qardaş ölkə başçısının ölkəmizə ilk səfəri olmasa da əminliklə deyə bilərik ki, bugünkü səfərlə iki qardaş ölkənin münasibətlərində yeni bir mərhələnin təməl daşları atılır.
Rəcəb Tayyib Ərdoğanla yanaşı Türkiyənin Müdafiə Naziri Hulusi Akar, MİT rəhbəri Hakan Fidan, Müdafiə Sənayesi rəhbəri İsmail Demir, Türkiyə Respublikası Prezident Administrasiyasının Kommunikasiya İdarəsinin sədri Fahrettin Altun, Prezidentin sözçüsü İbrahim Kalın, hakim Ədalət və İnkişaf Partiyasının sözçüsü Ömer Çelik, Türkiyə Böyük Millət Məclisinin NATO Parlament Assambleyasındakı nümayəndə heyətinin rəhbəri Osman Aşkın Bak, ASELSAN İdarə Heyətinin rəhbəri Haluk Görgün səfər protokolunda yer alıblar. Bu da iki ölkə arasında güc müstəvisində önəmli razılaşmaların mövcudluğundan, ələqələrin daha da möhkəmlənməsi üçün mühüm sənədlərə imzaların atılacağından xəbər verir. Bölgə üçün çox önəmli və hərbi-siyasi müvazinət daşlarını öz yerinə qoyacaq bir günə şahidlik edirik.
Təkcə iki qardaş ölkənin deyil, həm də bölgənin gələcək yönünü şəkilləndirən anlaşmalar reallığa çevrilir. Bu səfərin siyasi və iqtisadi yönlərinin dəyərini azaltmadan hərbi perspektivlər baxımından önəmini xüsusi ilə vurğulamağa dəyər. Bu anlaşmaların ən kritiklərindən biri də ASELSAN-ın ölkəmizə təklif etdiyi rabitə sistemlərinin istehsalı mövzusudur.
44 günlük vətən müharibəsində Türkiyənin təmsilçilərindən biri kimi Azərbaycanın yanında olan ASELSAN qələbənin əldə edilməsində özünəməxsus rol oynadı. Silahlı qüvvələrimizi çeşidli rabitə vasitələri, radio-elektron müşahidə və kəşfiyyat vasitələri, oprik cihazlar, müxtəlif təyinatlı texnika ilə təmin edən ASELSAN bu gün imzalanması gözlənilən razılaşma ilə ölkəmizi bir addım daha irəli götürmək niyyətindədir. ASELSANın texnologi araşdırmalarının nəticələrindən yararlanıb, illərin sınağından çıxmış çeşidli radio-rabitə vasitələri istehsal etmək Azərbaycan silahlı qüvvələrininin gücünə güc qatacaq. Bu razılaşmada Azərbaycana özəl kripto (şifrələmə) inkişaf strategiyası da yer almaqdadır.
Anar Şuşalı
hərbi jurnalist
