“Hər bir Azərbaycan vətəndaşı üçün sevindirici haldır ki, təxminən otuz ildən sonra itirdiyimiz Şuşanı işğaldan azad edib, ölkə başçımız Azərbaycanın mədəniyyət mərkəzi elan etdi”
Bunu açıqlamasında Şuşa özünümüdafiə batalyonunun sabiq komandiri Fəxrəddin Səfərov deyib. F.Səfərov Şuşaya bu gün Şəhidlərimizi ziyarətə getdiyini bildirib:
“İndi mən Şəhidlər Xiyabanına ziyarətə gedirəm. Hər bir Azərbaycan vətəndaşı üçün sevindirici haldır ki, təxminən otuz ildən sonra itirdiyimiz Şuşanı işğaldan azad edib, ölkə başçımız Azərbaycanın mədəniyyət mərkəzi elan etdi. Bu hamımız üçün sevindirici haldır. Bu mədəniyyət sözünün içində çox böyük atributlar var. Şuşanın görkəmli şəxsiyyətləri ilə bərabər, Şuşanın bütün tərəfləri, sözü-söhbəti, xeyri-şəri, bir sözlə, hamısı mədəniyyətdi. Hətta evdə süfrə mədəniyyəti demək olar ki, hər yerdən fərqlənir. Şuşada insanlar süfrəsiz stolda oturmayıb, çexolsuz yorğan-döşəkdə yatmayıb. Şuşanın mədəniyyət mərkəzi olmasıyla bərabər, vaxtilə onu kiçik Paris adlandırıblar. Bu mənim yaşlı adamlardan eşitdiyim tarixi bir hadisədir. Belə ki, vaxtilə Pənahəli xanın yüzbaşısı olan Əmir Muradın nəticəsindən eşitdiyimə görə o vaxt Fransadan Şuşaya gələn fransızlar kimə yaxınlaşıbsa, şuşalılar onlarla fransız dilində ünsiyyət qura bilib. Qonaq da deyib ki, “elə bura kiçik Parisdi ki”. O gündən indiyə kimi bildirilir ki, Şuşa Qafqazın konservatoriyasıdır, eyni zamanda, Şuşa kiçik Parisdi.
Mən bir daha hamımızı təbrik edirəm və gün o gün olsun ki, torpaqlarımızın işğalda qalan qismini də azad edib ərazi bütövlüyümüzü təmin edək. Bu qələbəni biz dövlətimizin apardığı siyasətə, xalqımıza, o torpaqlar uğrunda canından keçən şəhidlərimizə və qazilərimizə borcluyuq. Azərbaycan oğulları döyüşlər vaxtı imkan tapıb bunu mobil telefona çəkiblər və orda görünür ki, onlar hansı ruhla döyüşüblər. Bir az əvvəl mənə vaxtilə Şuşada briqada komandiri olan Elbrus Orucov zəng vurub dedi ki, “komandir, şəhidləri ziyarətə gedirəm, amma qalib kimi gedirik”. Həmin dövrdə bizim torpaqlarımızı işğaldan azad etməyə gücümüz çatmamışdı, amma sizin, bizim gördüyümüz havadarlar düşmənə kömək edirdi. Biz çox əzab-əziyyətlər çəkirdik. Biz də onda indiki döyüşçülərimiz kimi böyük ruh yüksəkliyi ilə döyüşürdük. Biz bu gün 1992-ci ildə Şuşanın işğal oldunduğu gündür. Mən Şəhidlər Xiyabanına şəhid olmuş oğullarımızın məzarını ziyarət etməyə gedirəm. Amma içimdə, daxilimdə, sizin də, mənim də şəhidlərimizə sözümüz odur ki, gözünüz aydın, artıq qanınız yerdə qalmadı. Biz məqsədimizə çatdıq, ərazi bütövlüyümüzü təmin etdik”.Moderator.az
