(Ləzgi balasının inanılmaz şücaəti)
Suqovuşanın qarşı tərəfindəki yüksəkliyi ələ keçirmək üçün ölüm-dirim savaşına girdik. Ərazi sıx meşəlik, keçilməz dar cığırlar, dağ və dərələrdən ibarət olduğu üçün əsasən yüngül çaplı silahlardan istifadə olunurdu. Ogünkü döyüşdə sərt müqavimətlə rastlasaq da, nəhayət, düşmən qüvvələrinə ağır zərbə vurub geri oturda bildik. Döyüş meydanında xeyli cəsəd qalaqlanmışdı.
Sakitlik yaranan kimi təpənin arxasındakı astanada istirahət üçün yer seçdik. Kimisi avtomatını yağlayır, kimisi mağazini doldurur, kimisi də az öncəki dəhşətin təfərrüatını cib dəftərçəsinə qeyd edirdi. Demək olar ki, sursat tamam tükənmiş, köməkçi qüvvə hələ də gəlib çıxmamışdı. Elə bu dəm yaxınlıqda düşmən PDM-i göründü, arxasınca xeyli canlı qüvvə irəliləyirdi. “Yaman yerdə axşamladıq” ifadəsi burada lap yerinə düşür. Daldalanmağa yer, mövqe seçməyə vaxt yox idi. Sanki ölüm gözümüzə baxa-baxa canımızı almağa gəlirdi. Yəni sözün bitdiyi yer idi. Hər kəs öz-özlüyündə həyatla vidalaşırdı sanki. Düşmən kabus kimi irəliləməkdə idi. Az öncəki zəfərin sevinci gözlərdə donmuş, nitqlər tutulmuşdu. Ruhum vücudumu tərk edərək göylərə – Allahın hüzuruna getmişdi, çünki belə bir məqamda bizi yalnız Yaradanın möcüzəsi xilas edə bilərdi. Ruhum göylərdə ikən döyüş zamanı silahdaşlarından elə də fərqlənməyən, arıq, cılız bədənli bir əsgər cəld yerindən sıçrayıb arxaya qaçdı. Qorxduğunu zənn etdiyim üçün, “kimsə yerindən tərpənməsin” deyə, heyrət içində gözləyən silahdaşlarımı təmkinli olmağa çağırdım. Elə bu dəm həmin cılız əsgər – ləzgi balası döyüşə yararsız olduğu üçün arxada saxladığımız ZTR-lə düşmənin PDM-nə qarşı hərəkətə keçdi. Dəhşətli, vahiməli anlar idi. ZTR-in atıcılıq qailiyyəti olmadığı üçün heyrətlə izləyir, ləzgi balasının nə edəcəyini kəsdirə bilmirdik. Ağır texnkalar üz-üzə gəlməkdə idi. Qəfləti manevr edən ləzgi balası bir göz qırpımında ZTR-i qarşı tərəfdən PDM-in üzərinə çıxara bildi. Hadisə gözlərimizin önündə baş versə də hələ də inana bilmirdik ki, yarasız ZTR düşmənin PDM-ini daha yarasız hala salıb. Yeganə ağır texnikasını itirən düşmən vahimə içərisində geri çəkilməyə cəhd etsə də, hücum edib hamısını güllədən keçirdik. Hətta əksəriyyətini öz silahları ilə cəhənnəmə vasil etdik. Bir qədər sonra ərazidə 45cəsəd qalaqlanmşdı.
Bu möcüzəvi uğur uca gözəgörünməzin haqqın, ədalətin tərəfində olduğunun sübutu olmaqla yanaşı, haçansa etdiyimiz xeyirxahlığın, yaxud da az öncəki dualarımızın cavabı idi, dedi, adının çəkilməsini istəməyən zabitimiz.
ÖTƏRXAN ELTAC
