Xarici işlər naziri Mövlud Çavuşoğlu Ermənistan-Türkiyə münasibətlərinin normallaşmasından danışıb.
Alp.az xəbər verir ki, Çavuşoğlu Ermənistan tərəfinin birbaşa görüş formatından yayındığını bildirib.
“Ermənistana demək istəyirəm ki, bəli, siz diasporun təzyiqi altında ola bilərsiniz, bu, əlbəttə ki, asan proses deyil, görürük ki, diaspor nizamlanma prosesinə dəstək vermir. Bir tərəfdən deyirsiniz ki, bir gün biz münasibətləri normallaşdıracağıq, sərhədləri açacağıq, amma hələ də İrəvanda, Ankarada görüşməyə cəsarət etmirsiniz. Əgər siz iki ölkədə bu məsələ ilə bağlı görüş təşkil etməyə cəsarət etməsəniz, digər məsələlərə necə yanaşacaqsınız?”, – nazir bildirib.
Çavuşoğlu əlavə edib:
“Bunu qınamaq üçün demirəm, amma ermənilər bir az cəsarətli olsunlar.
Türkiyədə danışıqlar aparmaq istəməməyinizin səbəbi nədir? Hətta deyirik ki, siz Türkiyəyə gəlməsəniz, biz İrəvana gələ bilərik. Ermənilər dedilər ki, üçüncü ölkədə görüşək. Başqa sözlə, daha cəsarətli addımlar atılmalıdır”.
