Gürcüstanın Baş naziri İrakli Qaribaşvilinin Azərbaycan səfəri və Ankara-Bakı-Tiflis əlaqələrinin inkişafı Ermənistan mediasında geniş müzakirələrə səbəb olub.
Həyacan təbili çalan məqaləni ermənilərin “hayeli.am” saytı yayıb. Saytda dərc olunan məqalədə Gürcüstan-Azərbaycan münasibətlərinin inkişafına və İrakli Qaribaşvilinin Prezident İlham Əliyevi Tiflisə səfərə dəvət etməsinə diqqət çəkilib.
Müəllif yazır ki, Prezident İlham Əliyev Qaribaşvili ilə görüşdə iki ölkə arasında siyasi, iqtisadi, nəqliyyat və enerji layihələrindən danışıb.
Sitat: “Türkiyə-Azərbaycan tandeminin Gürcüstana diqqəti Ermənistanı narahat etməlidir. Ankara və Tiflisin çox uzaq hədəflərinin olduğu göz qabağındadır. Bu yaxınlarda Türkiyə prezidenti Rəcəb Tayyib Ərdoğanın Gürcüstana səfər edəcəyi bildirilir. Hələ tarix məlum deyil. Bu barədə Türkiyənin Gürcüstandakı səfiri Fatma Ceren Yazqan deyib. Türkiyə tərəfi hazırda prezident Ərdoğanın Gürcüstana səfər tarixinin hökumətlə razılaşdırır. Səfir bildirib ki, yaxın gələcəkdə səfər mümkün olacaq”, – sitatın sonu.
Müəllif, Ermənistan prezidenti Armen Sarkisyanın Tiflisə son səfərinə də toxunub. Səfərin Türkiyənin Gürcüstanda hərbi baza yaradacağı barədə xəbərlərin yayıldığı zamana təsadüf etdiyi qeyd olunub.
Sitat: “Ermənistan mediası iddia edir ki, Türkiyə Gürcüstanda hərbi baza qurmağa hazırlaşır. Bazanın Gürcüstanın Cavaxetiya və Marneuli bölgələrində qurulacağı bildirilir. Bu iddialar Rusiya mətbuatına istinadən də payızda müharibədən əvvəl, müharibə zamanı da səsləndirilirdi. Bununla bağlı hələ ki rəsmi məlumat yoxdur. Həmçinin belə bir hərbi bazanın qurulacağı ilə bağlı da rəsmi təkzib yayılmayıb” – sitatın sonu.
Qeyd edək ki, ermənilər Gürcüstanın Cavaxetiya bölgəsində kompakt şəkildə yaşayırlar. Qarabağda olduğu kimi Cavaxetiya bölgəsinə də ərazi iddiası edən ermənilər, separatçılıq fəaliyyəti ilə məşquldurlar. Onlar zaman-zaman Gürcüstana ərazi iddiaları səsləndirirlər və müstəqillik tələb edirlər. Təbii ki, belə bir həssas regionda Türkiyə kimi regional gücün hərbi baza qurması Ermənistana ciddi mesaj kimi qəbul olunmalıdır.
