44 günlük Vətən müharibəsində dastan yazan oğullarımızdan biri də, ermənilərin qorxulu röyası olan kiçik gizir Siyahim Dəmirov idi. Bu gün şəhid xüsusi təyinatlımızın doğum günüdür.
Yaxın dostlarından biri Siyahimin ermənilərin qorxulu röyası olmasını belə xarakterizə edir. :“Gecə düşmən içərisinə daxil olan qrup həmişə işini bilirdi. Zabitlərin məhv edilməsi “Qartal” ləqəbli Siyahimin işi idi. O, peşəkarlığı ilə dastan yazmağı bacaran bir xüsusi təyinatlı idi.”
Şəhid Dəmirov Siyahim Əlizamin oğlu 1990-cı il sentyabrın 13-də Beyləqan rayonunun Əlinəzərli kəndində anadan olub. O, 1997-ci ildə Rizvan Nəsirov adına Əlinəzərli kənd 1 nömrəli tam orta məktəbin 1-ci sinfinə qədəm qoyub 2008-ci ildə həmin məktəbin 11-ci sinfini bitirib. Siyahim 2009-cu ildə Beyləqan rayon hərbi komissarlığı tərəfindən həqiqi hərbi xidmətə çağırılıb. O, Naftalan rayonunda yerləşən “N” saylı hərbi hissədə əsgər kimi qulluq edib. Tərxis olub, kəndlərinə qayıtdıqdan sonra “Azəriqaz” İstehsalat Birliyi Tərtər regional qaz istismarı idarəsinin Beyləqan xidmət sahəsində çalışıb.
Lakin peşəkar döyüşçü olmağı qarşısına məqsəd qoyan Siyahim 2013-cü ildə yenidən hərbi xidmətə qayıdıb. Sənədlərini “Müddətdən artıq həqiqi hərbi xidmət hərbi qulluqçularının hazırlığı” kursuna verib. Kursu uğurla bitirərək 2014-cü il fevralın 21-də Beyləqan rayonunda yerləşən “N” saylı hərbi hissədə top komandiri vəzifəsinə təyinat alıb. O, 2016-cı il aprel döyüşlərində iştirak edib öz döyüş qabiliyyəti, igidliyi və şücaəti ilə başqalarından fərqlənməyi bacarıb. Siyahim 2016-cı ildə “Gizir hazırlığı” kursuna gedib 6 aylıq kurs keçdikdən sonra “kiçik gizir” rütbəsi alaraq Xüsusi Təyinatlı Qüvvələrin Cəlilabad rayonunda yerləşən “N” saylı hərbi hissəsində xidmətinə davam edib.
O, Azərbaycan Xüsusi Təyinatlı Qüvvələrinin tərkibində Türkiyədə 23 ölkənin hərbçilərindən ibarət komandalar arasında pentatlon növü üzrə keçirilən “Efes-2018” təlimlərində iştirak edib. Həmin təlimdə Siyahimin də təmsil olunduğu komandamız birincilik qazanıb.
Xüsusi döyüş istedadına malik Siyahim müxtəlif vaxtlarda lokal toqquşmalarda iştirak edib onlarla düşmən diversantının məhv edilməsinə birbaşa töhfə verib. Cəbhənin ən kritik nöqtələrində, onlarla uğurlu əməliyyatların iştirakçısı və təşkilatçısı olan peşəkar döyüşçümüz Tovuz döyüşlərinin də aktiv iştirakçısı idi. Xidməti ərzində dəfələrlə şücaətinə görə, komandanlıq tərəfindən fəxri fərman və təşəkkürnamələr alıb.
Öz döyüş qabiliyyəti, igidliyi ilə seçilən Siyahim sentyabrın 27-dən İkinci Qarabağ müharibəsində döyüşlərə qoşulub. O, Füzuli, Cəbrayıl, Qubadlı şəhərlərinin, Hadrut qəsəbəsinin və ətraf kəndlərin işğaldan azad olunmasında böyük şücaət göstərmişdir. Qumbaratanla heyəti ilə birlikdə üç döyüş maşını vurmuş, düşmənə xeyli itki verib. Daşaltı əməliyyatı zamanı düşmənin bir neçə yüksək rütbəli zabitini məhv edib o cümlədən kəşfiyyatçısını əlbəyaxa döyüş zamanı boğaraq öldürüb.
O, oktyabrın 29-da bir neçə silahdaşı ilə birlikdə düşmən ordusunun mühasirəsinə düşür. Döyüş yoldaşları deyir:” Yalnız bir istiqamətdə mühasirədən çıxmaq imkanı olduğuna görə biz iki yerə bölünməli: bir hissəmiz aşkarlandığımız yerdə döyüşməli, digər qrup isə təhlükəsiz çıxış olduğu güman edilən istiqamətdə geri qayıtmalı idik. Siyahim təklif etdi ki, mən onlarla tək bacararam, siz çıxışa doğru hərəkət edin. Onunla razılaşmadıq və könüllü olaraq iki hissəyə bölündük. Siyahim aşkarlandığımız yerdə düşmənlə döyüşən qrupa komandir təyin edildi. Biz təhlükəsiz güman etdiyimiz çıxışa doğru hərəkətə başlayandan bir neçə dəqiqə sonra Siyahim onunla döyüşən silahdaşlarına çıxışa doğru hərəkət edən qrupun ardınca irəliləməyi əmr etdi. Ona etiraz edərək burda kimsə qalmasa, düşmən şübhələnib o biri qrupu aşkarlaya biləcəyini bildirdik. Həmin vaxt Siyahim: “Mən bunlarla tək bacararam, siz mane olursunuz. Siz çıxın, mən də ardınızca gələcəm. Sübh açılanda öz səngərlərimizdə görüşərik”,-dedi. Onlar çıxmaq istəməyəndə Siyahim komandir olaraq rəsmi əmr edib və ardınca döyüş yoldaşlarını silahla hədələdi ki, kim əmrə tabe olmasa, onu özü güllələyəcək. “Birincisi, ermənilər mənə heç nə edə bilməz, ikincisi də, siz hamınız evlisiniz, mən subay!”,-deyərək təkid etdi. Beləcə, biz – döyüş yoldaşları ondan ayrıldıq. Sübh çağı artıq həmin ərazilər düşməndən təmizlənmişdi, lakin Siyahim yox idi – iyrimi erməni əsgərini gəbərdərək şəhid olmuşdu”. Döyüş yoldaşlarının “Qartal” adlandırdığı Siyahim Dəmirov noyabrın 1-də Beyləqan Şəhidlər Xiyabanında uğrunda canını fəda etdiyi vətən torpağına tapşırılıb.
Subaydır. Ailədə iki qardaş,bir bacı idilər.
Azərbaycan Respublikasının ərazi bütövlüyünün bərpa edilməsi zamanı hərbi qulluq vəzifəsini yerinə yetirərkən igidlik və mərdlik nümunəsi göstərdiyinə görə kiçik gizir Dəmirov Siyahim Əlizamin oğlu ölümündən sonra Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin sərəncamları ilə “Vətən uğrunda” medalı və “Qarabağ” ordeni ilə təltif edilib.
Ramil Hikmət
