Səudiyyə Ərəbistanının rəhbərlik etdiyi koalisiya bazar ertəsi Yəmənin paytaxtına hava zərbələri endirib. Bu barədə CNN məlumat yayıb. Qeyd olunur ki, bu, İranın dəstəklədiyi husi üsyançıların Birləşmiş Ərəb Əmirliklərində ölümcül dron hücumuna görə məsuliyyəti öz üzərinə götürülməsindən sonra baş verib.
“Təhlükəyə cavab olaraq Sənaya hava zərbələri endirilib”, – Səudiyyə Ərəbistanının dövlət televiziya kanalı “Əl-Ekhbariya”nın Tvitter hesabında yazıb.
“Bu düşmənçilik hərəkətidir. Husilərin mülki şəxslərə hücumları müharibə cinayətləridir və məsuliyyət daşıyanlar cavab verməlidirlər”, – tvitdə deyilir.
Əbu-Dabi hava limanı yaxınlığında pilotsuz təyyarənin hücumu nəticəsində azı 3 nəfər həlak olub, BƏƏ paytaxtında isə bir neçə partlayış baş verib.
BƏƏ-nin rəsmi xəbər agentliyi WAM-ın məlumatına görə, hücum nəticəsində bir pakistanlı və iki hindistanlı həlak olub. Abu Dabi polisinin Facebook-da paylaşdığı məlumatda deyilir ki, daha səkkiz nəfər, o cümlədən iki hava limanının əməkdaşı və digər altı nəfər yaralanıb.
Husilərə məxsus “Əl Məsirə” telekanalının sözçüsü briqada generalı Yəhya Sari “təcavüzkar ölkələrə daha ağır zərbələr endiriləcək” deyərək, xarici şirkətlərə, BƏƏ vətəndaşlarına və sakinlərinə ölkədəki həyati əhəmiyyətli obyektlərdən uzaq durmağı məsləhət görüb.
Husilərin məsuliyyəti öz üzərinə götürməsindən bir neçə dəqiqə sonra Səudiyyə koalisiyası hava hücumlarına başlayıb. Yerli KİV-lər bildirir ki, son 24 saat ərzində Səudiyyə Ərəbistanının rəhbərlik etdiyi koalisiya Yəmənin müxtəlif bölgələrinə 24-dən çox hava hücumu həyata keçirib.
