Azərbaycanın artan iqtisadi potensialı ölkə iqtisadiyyatının şaxələndirilmiş şəkildə inkişafına zəmin yaradır. Əgər 90-cı illərin əvvəllərində Azərbaycan iqtisadiyyatının inkişafı yalnız neft faktorundan asılı idi və ancaq bu sahəyə investisiya qoyulurdusa, indi artıq qeyri-neft sektoru da inkişaf dövrünü yaşayır. Bu da qeyri-neft sektorunda yeni-yeni infrastrukturların, sənaye müəssisələrinin yaradılmasına yol açır. Bu günlərdə Azərbaycan Respublikasının Prezidenti İlham Əliyevin iştirakı ilə Ələt Azad İqtisadi Zonasının təməlqoyma mərasiminin baş tutması da deyilənlərin təsdiqidir. Hər şeydən əvvəl bu Azərbaycan iqtisadiyyatının qlobal səviyyəli risk və təhdidlərə baxmayaraq öz inkişaf tendensiyasını davam etdirdiyinin göstəricisidir.
Elə iqtisadçı ekspert Elvin Babayev də bu qənaətdədir. O bildirib ki, bu isə hər şeydən əvvəl düzgün idarəçilik və həyata keçirilən məqsədyönıü siyasətdən irəli gəlir: “Diqqət etsək görərik ki, bütün dünyanı bürüyən koronavirus pandemiyası əksər ölkələrin, hətta dünyanın iqtisadi baxımdan inkişaf edən ölkələrinin iqtisadiyyatını bərbad vəziyyətə qoyub, bu sahədə mənfi tendensiyalar özünü büruzə verib. Düzdür, bu hal Azərbaycana da təsirsiz ötüşməyib və pandemiya həyatımızın bütün sahələri kimi iqtisadiyyata təsirsiz ötüşməyib. Ancaq sevindirici hal ondan ibarətdir ki, Azərbaycan həm zamanında atdığı qabaqlayıcı addımlar, həm də həyata keçirdiyi düşünülmüş siyasət nəticəsində pandemiyanın iqtisadiyyata vurduğu zərbəni minimuma endirə bilib. Necə ki, bir neçə il əvvəl Azərbaycan bütün dünyanı bürüyən neft və maliyyə böhranından az itki ilə çıxa bildi, indi də pandemiyadan eyni temlə çıxmağı hədəfləyib və buna tədricən nail olur. Qeyd etdiyim kimi Ələt Azad İqtisadi Zonasının təməlqoyma mərasiminin keçirilməsi də bunun təsdiqidir”. Elvin Babayev deyib ki, sözügedən iqtisadi zonanın təməlinin qoyulması və onun qısa müddətdə istifadəyə verilməsi Azərbaycanın iqtisadi imkanlarını artıracaq, onun iqtisadi gücünə güc qatacaq: “Təməlqoyma mərasimində Azərbaycan Respublikasının Prezidenti Cənab İlham Əliyevin dövlət televiziyasına verdiyi müsahibədə qeyd etdiyi kimi bu layihənin icrası Azərbaycana böyük iqtisadi dividendlər qazandırmaqla yanaşı, ölkəmizin regionda mövqelərini daha da gücləndirəcək. Eyni zamanda Şərq-Qərb və Şimal-Cənub tranzit-nəqliyyat dəhlizlərində mühüm rolu olan respublikamızın strateji əhəmiyyətini daha da artıracaq. Bu iqtisadi zonanın yaradılması dövlət gəlirlərinin və büdcəyə daxil olan vəsaitin artmasına, yeni investisiyaların cəlb edilməsinə şərait yaradacaq”. Elvin Babayev onu da qeyd edib ki, iqtisadi zonanın Ələt ərazisində yaradılması da təsadüfi deyil. Onun sözlərinə görə, Ələt qəsəbəsində yeni Bakı Limanının mövcud olması iqtisadi zonanın da məhz burada layihələndirilməsini zəruri edir. İqtisadçı bildirib ki, məhz sözügedən liman Ələt İqtisadi Zonasının əhəmiyyətini daha da artıracaq və onun hərəkətliliyini intensivləşdirəcək: “Bildiyimiz kimi Ələt qəsəbəsində yerləşən yeni Bakı Limanı ölkəni qərblə Türkiyə və Avropa İttifaqı, cənubla İran və Hindistan və şimalla Rusiyanı birləşdirən nəqliyyat qovşağıdır. Bu baxımdan iqtisadi zonanın da məhz belə bir nəqliyyat qovşağının yaxınlığında yerləşməsi olduqca əhəmiyyətlidir və onun iqtisadi rentabelliyini daha da artıracaq. Bu o deməkdir ki, sözügedən nəqliyyat qovşağından istifadə edən ölkələr, eyni zamanda Ələt İqtisadi Zonasında da mövcud olacaq, öz mal və məhsullarını burada alıcılara təqdim edəcəklər”.
Məlumat üçün qeyd edək ki, Ələt Azad İqtisadi Zonasının ümumi sahəsi 850 hektardır. İqtisadi zonanın ümumi sahəsinin 60 hektarında layihələndirilmə artıq başa çatıb və inşaat işləri başlayıb, bütün infrastrukturun yaradılması üçün zəruri addımlar atılıb. Azad İqtisadi Zonanın yaradılmasında əsas məqsəd qabaqcıl idarəetmə təcrübəsinə uyğun yüksək əlavə dəyərli və ixracyönümlü istehsalı təmin etməkdir.
