Ölkənin baş naziri Castin Trüdo 19-20-ci əsrin əvvəllərində kilsənin nəzarətində olan yerli xalqların təlim mərkəzlərində baş vermiş kütləvi qırğın hallarını Kanada tarixinin rüsvayçı və qara səhifəsi adlandırıb. Artıq məlum olub ki, din xadimləri 1000-dən artıq aborigen uşağı, körpəni zorlayıb, işgəncə verib, öldürüb və kilsə ərazilərində basdırıblar.
Kanadada yaşayan azərbaycanlı Maqsud Hacıyev yazıb ki, yerli uşaqlara qarşı edilən rəftar məlum idi, amma son skandallar dəhşətlidir. Burada yerli qaradərili etnik azlıqlara qarşı zorakılıq halları da olub. Əslində Qərbdə kilsələrdə pedofillikdən geyliyə qədər bir çox iyrənc ənənələr var. Vatikanda da belə əməllər haqda vaxtaşırı bilgilər sızır. Bu, həmin Kanadadır ki, Xocalıda azərbaycanlılara qarşı qətliam törətmiş, körpələri süngüyə keçirmiş, hamilə qadınları öldürmüş, qoca, xəstə bilmədən zorakılıq etmiş ermənilərin müdafiəsinə qalxırlar. İndi məlum olur ki, pedofillərin cinayət törətdiyi ölkə nə üçün ermənilərə qahmar çıxırmış. Bizə humanizm dərsi keçmək istəyənlər, ağıl öyrədənlər ölkədə kilsələri yandırırlar, vəhşiliyə əl atırlar.
Bundan əvvəl də may ayında Kanadanın Kamloops şəhərində yerli əhalinin uşaqları üçün tikilmiş keçmiş məktəbin ərazisində 215 uşaq cəsədinin qalıqları tapılmışdı. Hindli uşaqları Kanada cəmiyyətinə inteqrasiya etmək üçün zorla bu internat məktəblərə aparılıb. Statistikaya görə, döyülmə və xəstəliklərdən əziyyət çəkən 150 min şagirddən ən azı 3.2 mini ölüb. Kanadadakı son rezident məktəb 1996-cı ildə bağlanıb. Hələ 2017-ci ildə Kanadanın Baş naziri Castin Tryudo sözügedən məktəblərdə oxuyarkən xəsarətlər almış şagirdlərə görə yerli xalqdan rəsmi olaraq üzr istəyib. Səlahiyyətli orqanlar zərərçəkmişlərə 800 milyon Kanada dolları (sonra 638 milyon dollar) ödənilməsi barədə qərar qəbul edib.
Eyni hallar Vatikanda olub. Roma papasına bağlı qurumlar Krakov şəhərinin arxiyepiskopu, kardinal Stanislav Dziviş haqqında araşdırmaya başlayıb.
Bundan əvvəl Vatikanın Varşavadakı nunsiaturası (səfirliyi-red.) Genuya şəhərinin arxiyepiskopu, kardinal Ancelo Banyaskonun Polşaya bu məsələ ilə əlaqədar səfər etdiyini bildirmişdi. Kardinal Banyasko papanın tapşırığı ilə tam bir həftə məsələnin təhqiqatı ilə məşğul olub. Xüsusilə Dzivişin 2005-2016-cı illərdə, Krakovdakı arxiyepiskopluq etdiyi dövrlər sıx araşdırmaya məruz qoyulub. Hazırda Yepiskop konfransları şurasına rəhbərlik edən Ancelo Banyaskonun bu çərçivədə yüzlərlə sənədi incələdiyi, onlarla görüş keçirdiyi məlum olub.
Kardinal Stanislav Dziviş arxiyepiskop olmazdan öncə Polşa əsilli Roma papası İoann Pavelin şəxsi katibi olub. Onun haqqında ilk ittihamlar Polşanın “TVN24″ telekanalında çıxıb. ”Don Stanislav. Kardinal Dzivişin başqa siması” adlı həmin proqramda nüfuzlu rahibin böyük miqdarda pul müqabilində pedofil keşişlərin əməllərini gizlətdiyi bildirilib.
Azlogos.eu saytının baş redaktoru, İsveçrədə yaşayan Ələkbər Əliyev qeyd edib ki, Vankuverdə neçə gündür kilsələr yandırılır, vandalizmə məruz qalır: “Artıq məlum olub ki, din xadimləri 1000-dən artıq aborigen uşağı, körpəni zorlayıb, işgəncə verib, öldürüb və kilsə ərazilərində basdırıblar. Budur bunların tarixi, əxlaqı… İndi də bizə dərs keçirlər”.
Siyasi şərhçi Ramiyə Məmmədovanın sözlərinə görə, Kanada kimi sivil bir ölkədə baş verənlər təəssüf doğurur. Onun fikrincə, hindulara Amerika qitəsində soyqırım edilməsi danılmaz faktdır: “Həm indiki ABŞ-da onları kütləvi şəkildə öldürüblər, həm də indi aydın olur ki, Kanadada belə ibtidai vəhşiliklərə yol verilib. Öz tarixinə baxmayıb, ondan utanc hissi keçirməyənlərin qarşısındakından ədalət tələb etməsi bir ayrı məzhəkədir. Kanada dövləti əfsus ki, ermənipərəst mövqeyi ilə bir neçə dəfə fərqlənib. Ancaq onlar bilməlidirlər ki, özləri necə hindu uşaqlarını öldürüblər, ermənilər də bizim körpələri Xocalıda qətlə yetiriblər”.
Siyasi təhlilçi hesab edir ki, bu gün Kanadada vandalizm yaşanır, kilsələr məhv edilir: “Bu da onların din adamları… O dövrdə din xadimləri pedofiliya ilə məşğul olublar, indikilər də ibadət yerlərini alovlayırlar. Bu, vəhşilikdir”.
Ekspert Kanada, Fransa kimi ölkələrin vaxtilə törətdiyi cinayətlərin onların qara ləkəsi olaraq qalacağını düşünür: “Bəs Fransa, Kanada Bərdə, Gəncə, Tərtər faciələri zamanı harada idi? Onların XİN-i niyə etiraz bəyanatı yaymırdı ki, şəhərin mərkəzinə, dinc əhaliyə qadağan olunmuş raket atmaq olmaz? Bütün bu sualların bir cavabı var, bu da anti-Azərbaycan mövqedir. Azərbaycan Ordusu ermənilərdən fərqli olaraq hərbi cinayətlərlə yox, işğalçılarla döyüşə-döyüşə torpaqlarını azad etdi”.müsavat.com
