İqtisadiyyat Nazirliyinin yeni inzibati binası sosial şəbəkələrdə və mətbuatda geniş müzakirəyə səbəb olub.
Belə ki, nazirliyin yeni binasının görüntüsü onun heç də ucuz olmayacağı barədə fikir yaradıb və xüsusilə indiki pandemiya, Qarabağda tikinti-abadlıq işlərinin ön planda olduğu bir zamanda bu məsrəfin yersiz olduğu bildirilir. Rəsmi məlumata görə, 772 əməkdaşın rahat və səmərəli fəaliyyəti üçün binada hər cür şərait yaradılıb.
H.Əliyev prospekti 105 və Müzəffər Nərimanov küçəsinin kəsişməsində tikilən bu bina 169 metr yüksəkliyindədir və 33 mərtəbədən ibarətdir. Binanın 2018-ci ildə istifadəyə veriləcəyi planlaşdırılsa da, hələ təhvil verilməyib. Ancaq bu, Bakıdakı ilk belə bahalı bina deyil. Bir müddət öncə Mərkəzi Bankın da 218 milyon avroluq yeni bina tikdirəcəyi xəbəri mediada reaksiyalara səbəb olub.
Məsələ ilə bağlı danışan sabiq deputat, iqtisadçı Nazim Bəydəmirlinin sözlərinə görə, Azərbaycan hökuməti neft gəlirlərinin uzunmüddətli olacağını düşündüyü üçün belə binalar tikilirdi:
“Fazil Məmmədovun vaxtından bu bina tikilməyə başlanıb. Ümumiyyətlə, Heydər Əliyev prospektində zavodlar bağlandıqdan sonra neft pullarının çox gələn vaxtları belə binalar tikməyə başladılar. Çox təəssüf edirəm ki, Azərbaycan hökuməti neft gəlirlərinin uzunmüddətli olacağının düşünüb belə addımlar atıb, dəbdəbəli binalar tikilir. Kifayət qədər böyük vəsaitlər tikinti-quruculuq adı altında mənimsənilir. Əslində, idarəçiliyi təkmilləşdirmək üçün idarəetmə xərclərini azaltmaq lazımdır. Bu, əvvəldən başlayan dəbdir. Azərbaycan hökuməti hesab edir ki, dəbdəbəli binalarda qurumları yerləşdirməklə iqtisadiyyat dirçələcək, vətəndaşların gəlirlərini artıracaq”.
İqtisadçı Natiq Cəfərlinin sözlərinə görə isə, tikintini yarıda saxlamaq daha baha başa gələrdi:
“Binaların tikintisi ilə bağlı qərarların bir çoxu illər öncə verilib. Hətta neftin çox baha olduğu dönəmdə, 2011-ci ildə Heydər Əliyev prospektində arxitekturası cəlbedici olan dövlət binalarının tikintisi nəzərdə tutulmuşdu. Neftin qiymətinin 100 dollardan çox olduğu bir vaxta belə qərarlar vermişdi. 2015-ci ildə devalvasiyadan sonra bu qərarların verilməsi dayandı. Ancaq hansı binaların tikintisinə razılıq verilmişdi, o binaları tikmək lazım idi. Bağlanmış müqavilələrin bir çoxunda xarici tikinti şirkətləri iştirak edir. Onlarla müqavilədən imtina etmək və ya tikintini yarıda saxlamaq daha baha başa gələrdi. Çünki qərarlar vaxtında səhv verilmişdi”. İqtisadçının sözlərinə görə, Mərkəzi Bank da belə bir bina tikəcəkdi və qurumdan bina ilə bağlı verilən açıqlama çox məntiqli deyildi: “Mərkəzi Bank yeni inzibatı bina tikintisi ilə bağlı açıqlama vermişdi. Açıqlamaya görə, onlar binanı əlavə gəlirlər hesabına tikəcəkdi. Mərkəzi Bank dövlət orqanıdır. Hökumət də yox, birbaşa dövlət orqanıdır. Onun əlavə gəlirləri də dövlətindir. Ona görə onların açıqlması məntiqli deyildi. İşğaldan azad olunmuş torpaqların bərpasına 40-50 milyard manat vəsait lazım olacaq. 10 ildə bu vəsaitin mənbələrini tapmalıyıq. İzafi xərclər heç olmasa bundan sonra azaldılmalıdır”.
Natiq Cəfərli bildirib ki, belə binaların tikintisində korrupsiya hallarının olması ehtimalı çox yüksəkdir:
“Bununla bağlı hüquq mühafizə orqanları araşdırma aparmalıdır. Təbii ki, korrupsiya hallarının olması ehtimalı çox yüksəkdir. Əlimizdə fakt olmadığı üçün ittiham etmək qeyri-peşəkarlıqdır”.Cebhe.info
