Bu gün şəhid kəşfiyyatçımız İmamədin Abdullazadənin anım günüdür.
Şəhid Abdullazadə İmaməddin Əsgər oğlu 1996-cı il avqustun 4-də Beyləqan rayonunun Kəbirli kəndində dünyaya gəlib. 2002-ci ildə şəhid Eldar Əliyev adına Kəbirli kənd 2 nömrəli tam orta məktəbin 1-ci sinfinə daxil olan İmaməddin 2013-cü ildə həmin məktəbi bitirib. 2014-cü ilin oktyabrında Səfərbərlik və Hərbi Xidmətə Çağırış üzrə Dövlət Xidmətinin Beyləqan rayon şöbəsi tərəfindən həqiqi hərbi xidmətə çağırılıb. Şəhidimiz Silahlı Qüvvələrin Qazax rayonunda yerləşən”N”saylı hərbi hissəsində xidmətdə olub. İlk günlərdən düşmənlə üzbəüz postlarda xidmət edən İmaməddin bu barədə ailəsinə heç nə demir, onları narahat etmək istəmirdi.
O, hələ gənc əsgər olarkən özünü bacarıqlı və nizam-intizamlı, cəsur hərbi qulluqçu kimi göstərərək tutduğu vəzifənin öhdəsindən layiqincə gəlib. Ona verilən tapşırıqları vaxtında və dəqiq yerinə yetirərək əsgərlər arasında xüsusi hörmət qazanmışdır. Xidməti dövründə hərbi biliklərə yiyələnmiş İmaməddinə öyrəndiklərini tətbiq etmək elə xidmətinin son günlərində qismət olmuşdur. 2016-cı il Aprel döyüşləri başlayanda onun tərxis vaxtı olsa da, o da bütün vətən övladları kimi vətənin keşiyində dayanmağı seçib. Aprel döyüşlərində mənfur düşmənin ən pis üzünə şahid olan İmaməddin xidmətdən qayıtdıqdan sonra sənədlərini “Müddətdən artıq həqiqi hərbi xidmət hərbi qulluqçularının hazırlığı” kursuna verib. Kursu uğurla bitirərək Beyləqan rayonunda yerləşən “N” saylı hərbi hissənin kəşfiyyat taborunda xidmətə başlayıb. Müddətli həqiqi hərbi xidməti dövründə əsl hərbçi kimi püxtələşmiş İmaməddini bildiklərini gənc əsgərlərə öyrətməsi üçün 3 çağırış müddətinə kursda müəllim kimi saxlayırlar. Hələ Vətən müharibəsi başalamadan öncə yenidən Füzuli rayonu Kürdmahmudlu kəndində “çavuş hazırlığı” kursunda işləyən İmaməddin 24 sentyabr da son dəfə evlərinin yolunu tutaraq ailəsi ilə sağollaşıb xidməti yerinə qayıdıb.
27 sentyabrda irəli əmri verilən ilk saatlarda başında İmam Hüseyn çalması, dilində Allahu Əkbər nidası, qəlbində vətən sevdası, əlində silahı ilə irəli atılan İmaməddin Füzuli rayonu uğrunda gedən döyüşlərdə iştirak edib. Füzuli rayonunun Qaraxanbəyli kəndi istiqamətində yaralansa da, bunu ailəsinə bildirməmiş və döyüşlərdə iştirak etməyə davam etmişdir. Oktyabrın 21-i yaxın dostu və həmkəndlisi şəhid Abbasov Şamxalın dəfn mərasiminə gələn İmaməddin çox keçmədən yenidən cəbhəyə qayıtmışdır.
Əfsanəvi döyüşçümüz bir neçə gün sonra yanına minomyot mərmisi düşməsi nəticəsində travma aldığına görə müayinə üçün evə göndərirlər. O, müayinə olunmadan ağrı kəsici dərmanlardan istifadə edərək yenidən döyüş meydanına dönmüşdür. Füzuli şəhəri, Hadrut qəsəbəsi, Tuğ kəndi istiqamətlərində şərəfli döyüş yolu keçmiş İmaməddin döyüşlər sırasında öz ibadədtindən də qalmır, namazını gecikdirmirdi.
Alnına İmam Hüseyn çalması bağladığı üçün döyüş yoldaşları onu çalmalı deyə çağırırdı. İmaməddin hər zaman döyüş yoldaşlarının imdadına yetər, yaralı və şəhidlərin təxliyyəsində yaxından iştirak edərdi. İmaməddin artıq Şuşanın bir addımlığında Daşaltı kəndi uğrunda gedən qızğın döyüşlərdə idi. Onun tabeliyində bir qrup da vardi özü Urfan adlı yoldaşı ilə öncədən kəşfiyyata gedir, ərazini öyrəndikdən sonra əsgərlərini ardınca haraylayırdı. Müharibənin 39-cu günü Daşaltı istiqamətində gedən döyüşlər zamanı əsgərlərindən birinin qumbaraatanında problem yarandığını görən İmaməddin ona kömək etmək üçün gedir, çünki evlərdə gizlənmiş düşməni yalnız həmin silahla zərərsizləşdirmək olurdu. Əsgərinə kömək etməyi bacaran İmaməddin düşmən snayperinin hədəfindən yayına bilmir.
Noyabrın 5-i səhər saatlarında xain düşmən snayperinin açdığı atəşlə şəhidlik məqamına ucalır. Şəhidimiz sankı cənnətin qoxusunu hiss edibmiş kimi döyüşlər zamanı həyatını xilas etdiyi əmisi oğluna zəng edib, vəsiyyət etməyi də unutmayıb:
“Başqalarına bu barədə deyəndə pis oluram və kövrəlirəm, vəsiyyətimi açıq şəkildə ancaq sənlə bölüşə bilirəm. Nə olsa da möhkəm olun, bəlkə xeyirlisi budur, bəlkə o uca zirvəni Allah mənə də nəsib edər… Hər şey ola bilər, barışmaq lazımdır. Allahın bəxş etdiyi rəhmət yaxşıdır. Baş daşımı qoyarsınız, sinə daşı qoymarsınız. Qoy Allahın bəxş etdiyi rəhmət yağışı axirətə qədər üstümə yağsın”.
Şəhidimiz subay idi. Ailədə iki qardaş, bir bacı idilər.
Cəsurluğu və qəhrəmanlığı ilə adını tariximizə əbədi yazan əsgər Abdullazadə İmaməddin Əsgər oğlu ölümündən sonra iştirak etdiyi döyüş əməliyyatlarında və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin sərəncamları ilə “Vətən uğrunda” və “Qubadlının azad olunmasına görə” medalları ilə təltif edilib.
Ramil Hikmət
