“Carçı” Tarix və Mədəniyyət Araşdırmaları Mərkəzi 1957-ci ildə üçrəngli milli bayrağımızı 1 saat qız qalasında dalğalandırmış və bu səbəbdən ağır repressiyaya məruz qalaraq ömrünün 10 ilini məhbəsdə keçirmiş dissident Cahid Hilaloğlunun adını əbədiləşdirmək üçün 2019-cu ildə eyni adlı “Cahid Hilaloğlu” mükafatı təsis edib. Mükafat hər ilin noyabr ayında mərkəzin üzvlərinin bir illik müşahidəsi və ümumi rəyi ilə seçilən şəxsə təqdim edilir.
Mükafat gümüşdən hazırlanmış, qızıl suyuna çəkilmiş, bayrağımızı əksini tapmış hilal və səkkizguşə ulduzlu yaxa nişanından ibarətdir.
“Carçı” Araşdırma Mərkəzi bu il mükafatı ictimai fəal Ramin Orucova təqdim edib.
Mərkəzin sədri Sərxan Carçının bildirdiyinə görə mükafat Ramin Orucova 44 günlük vətən müharibəsi və sonrakı günlərdə göstərdiyi aktiv fəaliyyətə görə təqdim olunub:
“Əyalətdə yaşayan Ramin Orucov heç bir mətbu orqanın işçisi olmaya-olmaya 44 gün vətən müharibəsi ərzində və ondan sonra sosial mediada rəsmi və doğru xəbərlərlə xalqımızı məlumatlandırdı. Həmin həyacanlı günlərdə böyük qism insan onun yaydığı xəbərlərlə təsəlli tapırdı. Müşahidələrimiz onu göstərdi ki, saxta xəbərlər yayaraq reytinq toplamaq istəyən şəxs və media qurumlardan fərqli olaraq Ramin Orucov heç bir məlumatı dəqiqləşdirməmiş paylaşmayıb.
Onun bu və digər maarifləndirici fəaliyyətlərini nəzərə alaraq CARÇI Araşdırma Mərkəzi olaraq “Cahid Hilaloğlu” mükafatını 2021-ci ildə Ramin Orucova təqdim edirik.
