Ermənistan və Azərbaycan arasında yeni sənədlərin imzalanması haqqında mətbuatda məlumat yayılıb. Alp.az xəbər verir ki, məlumatı yayan Rusiya mətbuatı yeni sənədin nədən ibarət olacağının detallarını açıqlamayıb. Hərbi ekspert Ədalət Verdiyev Noyabrın 9-da Moskvada imzalanacağı gözlənilən sənədlərlə bağlı fikirlərini bildirib:
“Noyabrın 9-da Moskvada Azərbaycan və Ermənistan iki yeni sənəd imzalaması gözlənilir. Birinci sənəd 1920-ci illərdə Sovet İttifaqı Müdafiə Nazirliyinin Baş Qərargahının xəritələrinə əsas qəbul edərək İrəvan və Bakının bir-birinin sərhədlərini və ərazi bütövlüyünü tanıyacağı Ermənistan-Azərbaycan dövlət sərhədinin demarkasiya və delimitasiyasına aiddir. Vladimir Putin dünən bu xəritələr haqqında dedikləri təsadüfi deyildi. Azərbaycan, Rusiya və Ermənistan arasında Baş nazirlərin müavinləri səviyyəsində keçirilmiş son görüş nəticəsində barəsində demək olar son razılığın əldə olunduğu ikinci sənəd regionda kommunikasiyaların blokadadan çıxarılmasına, xüsusən də yol-dəhlizlərin, eləcə də Azərbaycanla Naxçıvan arasında kommunikasiyanın təsdiq edilməsinin detallarına aiddir. 9 noyabr xüsusi olaraq seçilib.”
