Bakıda çimərliklər açılar-açılmaz, vətəndaşlar üçün müəyyən problemlər yaranıb. Sosial şəbəkələrdə yazılanlara görə, Bilgəh qəsəbəsində “Daçnikov” çimərliyinə gedən giriş vətəndaşların üzünə hasarlanıb.
Sosial şəbəkələrdə yayılan fotolardan görünür ki, çimərliyə giriş yolu dəmir arakəsmə ilə bağlanıb. Bu da vətəndaşların narazılığına səbəb olub.
Bakı Şəhər Ticarət və Xidmət Departamentinin direktoru İntiqam Məmmədov Cebhe.info–ya açıqlamasında bildirib ki, həmin ərazidə çimmək qadağan olunub:
“Həmin o çimərlik qadağan olunmuş ərazidir və orada çimmək olmaz. Bu yaxınlarda orada 26 yaşlı oğlan batıb. Buna görə çimərliyə yaxın ərazidə vətəndaşlara istirahət üçün şərait yaradılıb. Həmin ərazidə zəruri işlər həyata keçirilib. Məqsəd odur ki, vətəndaşlar həmin qadağan olmuş ərazidə çimməsinlər, gəlib bizim nəzarətimizdə olan yerdə çimsinlər. Orada qapı bağlı deyil. Dəmir barmaqlıqdan bir az o tərəfdə vətəndaşların girişi və çıxışı üçün qapı var”.
