Azərbaycanın siyasi vitrinində görünən simaların əksəriyyəti xalq hərəkatının “köynəyindən” çıxmış şəxslərdir. Onlar ilk dəfə ötən əsrin 80-ci illərinin sonunda Azadlıq meydanında gözə dəyiblər. İsa Qəmbər, Əli Kərimli, Arif Hacıyev, Sərdar Cəlaloğlu, Sabir Rüstəmxanlı, Qüdrət Həsənquliyev, Fazil Mustafa və digərləri 30-32 il əvvəl olduğu kimi yenə müxalif düşərgənin əsas simaları olaraq qalırlar. Belə demək mümkündürsə, dəyişən təkcə soyadların sonundakı rus şəkilçiləridir.
Maraqlıdır, Azərbaycanda niyə yeni siyasətçilər yetişmir? Köhnələr yenilərin yolunu kəsir, yoxsa heç kim siyasətçi olmaq istəmir?
Alp.az-ın məlumatına görə, yenisabah.az-a danışan Azərbaycan Demokrat Partiyasının sədri Sərdar Cəlaloğlu qeyd edib ki, siyasət ancaq yaşlı, oturuşmuş, təcrübəsi olan adamların məşğuliyyət sahəsi ola bilər:
“Uşaq nədir, siyasət nədir, dövlət nədir? Ən azı insanın həyat təcrübəsi, müəyyən savadı olmalıdır. Ömründə bir kitab oxumayan adamın xalqın qabağına çıxıb siyasətçi olduğunu deməsi məntiqsizdir. Bu, sizin üçün heyvandarlıq deyil ki, mütləq cavan adam işləsin. Siyasət ağıldır, təcrübədir”.
Adıçəkilən şəxslərin elə gənc yaşdan siyasi arenaya qatıldığını xatırlaqtdıqda isə Sərdar Cəlaloğlu indiki gənclərin təzyiqlərə çox tab gətirə bilmədiyini, elə buna görə də siyasətdən uzaq qaçdıqlarını vurğulayıb:
“Nelson Mandela 70 il, Xo Şi Min 65, ABŞ prezidentlərinin də hərəsi 40-50 il siyasətçi olub. Bəli, onlar gənc yaşda siyasətə başlayıblar, amma bəzi adamlar da var ki, 40-50 yaşından sonra başlayıb. Bu gün gənc yaşda siyasətə başlanılmamasının əsas səbəbi pressinqdir. Təhlükə var, təqib var. Gənc nəsil bu təzyiqlərə o qədər də sinə gərə bilmir. Ona görə də siyasətlə maraqlanmırlar. Köhnə nəsil o qədər sınaqlardan keçib ki, indiki vəziyyət onları siyasətdən uzaqlaşdıra bilmir. Biz Xalq Hərəkatında o qədər döyülmüşük, söyülmüşük ki, indi bizi nə ilə qorxudacaqlar? Köhnələr qətiyyən yenilərə mane olmur. Bir nəfər digərinə qalib gələrək lider olur. “Sən çəkil, mən gəlib lider olum”,- demək oyunbazlıqdır. Gərək, mübarizə olsun və sən qalib gəlib lider olasan”.
