44 günlük savaşın başa çatmasından 18 aya yaxın zaman keçsə də, Azərbaycan və Ermənistan arasında sülh müqaviləsi bağlanmayıb. Digər tərəfdən, Ermənistan müharibənin başa çatmasını özündə ehtiva edən 10 noyabr bəyannaməsinin də maddələrinə əməl etmir, davamlı olaraq dövlət sərhədində təxribatlara əl atır, atəşkəs rejimini pozur, Azərbaycan Silahlı Qüvvələrinin mövqelərini atəşə tutur. Buna görə Rusiya, eləcə də digər beynəlxalq müttəfiqləri hələlik ona heç nə demir. Rəsmi Bakı isə bütün bunlara rəğmən qarşı tərəflə sülh müqaviləsi bağlamaq üçün davamlı səylər göstərir. Lakin erməni təxribatlarına qarşı da layiqli cavab verilir. Dövlət sərhədində erməni təxribatlarının artması və işğalçı ölkədə revanşist qüvvələrin baş qaldırması Azərbaycanı əlavə tədbirlər görmək məcburiyyətində buraxır.
Hərbi ekspert Ədalət Verdiyev hesab edir ki, yaxın günlərdə erməni tərəfi öz cəzasını ala bilər. Alp.az-a açıqlamasında Ədalət Verdiyev bildirib ki, Ermənistan Zəngəzur dəhlizinin açılmasını qəsdən yubadır:
” Burada maraqlı qüvvələr var. Hesab edirəm ki, Ermənistanın danışıqlar prosesindəki mövqeyi kimlər tərəfindənsə idarə olunur. Ermənilərin təxribatının qarşısı alınacaq. Azərbaycan birgə bəyanatdakı imzasını geri çəkə və hərbi əməliyyatlara başlaya bilər. Və yaxud Hadrutda keçrilən anti-terror əməliyyatı Qarabağın digər bölgələrində də həyata keçirilə bilər. Bir sözlə rəsmi İrəvan danışıqlar prosesindən qaçmaqla və yaxud sülh müqaviləsini yubatmaqla anti-terror əməliyyatının başlanmasını sürətləndirir” -deyə hərbi ekspert bildirib.
