Son günlər Qarabağda biri-birinin ardınca mitinqlər təşkil edilir. Xankəndində təşkil olunan mitinqlərdə qondarma rejimin rəhbəri Araik Arutunyanın istefası tələb olunur.
Alp.az xəbər verir ki, bu gün səhər yenə Xankəndində ermənilər təqribən 300 nəfərlik mitinq təşkil ediblər. Onlar Araik Arutunyanı istefaya səsləyiblər. Bunun ardınca mitinqə gələn Araik Arutunyanın tərəfdarları ilə mitinqdəkilər arasında əlbəyaxa dava düşüb. Ərazidəki polislər onları ayırıb. Bu arada erməni mətbuatı iddia edir ki, Rusiya Qarabağda öz adamını vəzifəyə gətirmək niyyətindədir. İdiia edilir ki, bu şəxs keçmiş müdafiə naziri Seyran Ohanyandır. Qeyd edək ki, erməni mətbuatı Ohanyanın azərbaycanlı oldğunu yazıb. Bu iddia hələ bir neçə il öncə də mətbuatda yer almışdı.
Seyran Ohanyan 1962-ci il, iyulun 1-də Azərbaycanın o vaxtkı Dağlıq Qarabağ Muxtar Vilayətinin Şuşa şəhərində (bəzi mənbələrə görə, Daşaltı kəndində) anadan olub. Onun atasının azərbaycanlı Surxay Mədətov olduğu bilinən faktdır. Amma rəsmi məlumatlarda deyilir ki, atası olmuş Muştaq adlı erməni Ermənistanda-Gorusda anadan olub.
Bildirilir ki, Surxay Mədətovla erməni Aida Ohanyan Şuşadakı təhsil müəssiələrindən birində tanış olublar. 1961-ci ildə onlar ailə həyatı qurublar. 1969-cu ildə Seyranın atası arvadının pozğunluğuna görə Şuşa bazarında onun üzünə kislota atıb. Lakin ölməyib, müalicə olunub sağalıb. Bu hadisəyə görə atası həbs edilib, 3 illik həbsdən çıxandan sonra vərəm xəstəliyindən ölüb.
Seyran Ohanyanın bacısı da Şuşada doğulub, Bakıda yaşayıb və məlum hadisələr başlayanda Moskvaya köç edib.
Ohanyan 1969–1979-cu illərdə Şuşada 2 saylı rus məktəbində təhsil alıb. 1979-cu ildə isə 10 illik təhsilinə yekun vuraraq Bakı Ali Hərbi Ümumqoşun məktəbinə qəbul olub. Ohanyan Bakıda hərbi təhsil aldığı illərdə erməni həkim qadınla evlənib. Xidmət illərinə Almaniyada SSRİ birliklərində başlayan Ohanyan, sonra Gəncədə dislokasiya olunmuş 23-cü diviziyada hərbi xidmətdə olub. Sonra Xankəndindəki 366-cı motoatıcı alayda bölük komandiri təyinatı alıb. 1992-ci il fevralın 25-dən 26-na keçən gecə erməni separatçılarının Xocalıya hücumu zamanı Seyran Ohanyan 366-cı motoatıcı alayın tərkibində bu qətliamın istirakçılarından olub. 1992-ci ilin sentyabrında Xocavənd döyüşlərində ağır yaralanıb, ayağının birini itirib.
Xocalı soyqırımının törədilməsində də Seyran Ohanyan iştirak edib.
O, Serj Sərkisyanla olan yaxın dostluğu sayəsində, Sərkisyan prezident olandan sonra Silahlı Qüvvələrin Baş Qərargah rəisi, sonra isə müdafiə naziri postuna gətirilib. 2008-ci ilin aprelindən 2016-ci ilin oktyabrınadək Ermənistanın müdafiə naziri olub.
