ABŞ Türkiyəyə modernləşdirilmiş F-16 qırıcılarını satmaqdan imtina edərsə, Ankara Rusiya tərəfindən hazırlanmış Su-35 və Su-57 qırıcılarını almağı nəzərdən keçirə bilər. Bunu Türkiyə xarici işlər naziri Mövlud Çavuşoğlu bildirib, – “Anadolu” agentliyi yazır.
Onun sözlərinə görə, bu vəziyyət Türkiyənin öz təyyarələrini istehsal etməyə başlayana qədər davam edəcək.
“Bu məsələdə əsas məqam Ağ Evin mövqeyidir. Co Bayden administrasiyası Konqresi Türkiyəyə silah satışını dəstəkləməyə razı sala bilər. ABŞ səlahiyyətliləri qətiyyətli olsalar, qanunvericilər qərarı dəstəkləyəcəklər”, – Çavuşoğlu bildirib.
Türkiyə prezidenti Rəcəb Tayyib Ərdoğan oktyabr ayında bəyan etmişdi ki, Vaşinqton Türkiyəyə F-16 qırıcılarını verməyi təklif edib. Bu qırıcılar bir neçə il əvvəl Ankaranın xaric olunduğu F-35 proqramına Türkiyə tərəfindən daha əvvəl yatırdığı sərmayələr müqabilində vəd olunub.
