Dünən bəzi yerli KİV-lər Xalq artisti Ağadadaş Ağayevin vəfat etdiyi barədə xəbər yayıb.
İfaçının ölüm xəbərini ilk təkzib edən xeyriyyəçi Hacı Nuran olub.
O, bu barədə İnstagram səhifəsində post paylaşaraq bəzi sayt rəhbərlərini reytinq xətrinə bu cür xəbərləri tirajlamaqda günühlandırıb.
Xeyriyyəçi qeyd edib ki, bu xəbəri eşitdikdən dərhal sonra Türkiyəyə səfər edərək, hazırda orada xərçəng xəstəliyindən müalicə alan ifaçını ziyarət edib. Onun sözlərinə görə, hazırda Ağadadaş Ağayevin səhhəti normaldır və o, özünü yaxşı hiss edir.
“Hazırda onun yanındayam. O, bu xəbərlərə baxıb gülür. Amma gözlərinin dərinliyində təəssüf hissi olduğunu görürəm. Ürək-dirək verir, fikir verməməyi xahiş edirəm. Bəzi sayt rəhbərlərinə bildirim ki, Ağadadaş Ağayev sağ-salamatdır və hazırda müalicəsi də davam edir. Həyat yoldaşı da, mən də yanındayıq. Narahatlığa heç bir əsas yoxdur”,- deyə o, qeyd edib.
Xatırladaq ki, Xalq artisti Ağadadaş Ağayev bir müddət əvvəl Türkiyədə əməliyyat olunub.
Hazırda müalicəsi davam edən müğənni xərçəng xəstəliyindən əziyyət çəkir.
