ABŞ prezidenti Co Bayden Vaşinqtonla Moskva arasında birbaşa hərbi qarşıdurmaya səbəb olacaq qərarlar qəbul etmək niyyətində deyil.
Alp.Az-ın “Amerikanın Səsi”nə istinadla verdiyi məlumata görə, bunu Ağ Evin kommunikasiyalar üzrə direktoru Keyt Bedinqfild deyib.
“Prezident Ukraynaya konkret olaraq nə göndərəcəyinə qərar verərkən iki şeyi nəzərə alır”, – deyən Bedinqfildin sözlərinə görə, “birincisi, Ukrayna Silahlı Qüvvələri üçün nəyin ən effektiv və ən faydalı olacağı barədə ordunun qiymətləndirməsidir”.
Ağ Ev sözçüsünə görə, ikinci amil Baydenin “Amerika silahlı qüvvələri ilə Rusiya silahlı qüvvələri arasında birbaşa münaqişəyə can atmamasıdır”.
Bedinqfildin vurğuladığı kimi, ABŞ prezidenti belə qərarlar verməyəcək.
“O, ABŞ və Rusiya ordusu arasında birbaşa münaqişəyə səbəb olan qərarlar qəbul etməyəcək”, – Bedinqfild əlavə edib.
Eyni zamanda, Ağ Evin nümayəndəsi vurğulayıb ki, “ABŞ-ın Ukraynaya göstərdiyi hərbi yardımın həcmi və miqyası misilsizdir”.
Bundan əlavə, Bedinqfild qeyd edib ki, “biz Ukrayna ilə onlara suverenlik və təhlükəsizliyi təmin etməkdə kömək edə biləcəyimiz yollarla bağlı davam edən müzakirələr prosesindəyik. Amma hazırda danışa biləcəyim təhlükəsizlik zəmanətləri ilə bağlı konkret təfərrüatlar yoxdur”.
Bildiyiniz kimi, Bayden çərşənbə günü Ukrayna prezidenti Vladimir Zelenski ilə telefonla danışıb. O, bəyan edib ki, ABŞ büdcədən birbaşa yardım şəklində Ukraynaya 500 milyon dollar ayırmaq niyyətindədir.
Bayden Zelenskini əmin edib ki, Birləşmiş Ştatlar müttəfiqləri ilə birlikdə Ukrayna xalqına hərbi, iqtisadi və humanitar yardım göstərmək üçün əlindən gələni edir, həmçinin Ukraynaya qarşı amansız təcavüzünün ağır bədəlini Rusiyaya hiss etdirmək üçün addımlar atır.
Prezidentlər ötən həftə Ukraynaya elan edilən əlavə sanksiyalar və humanitar yardımı da müzakirə ediblər.
Martın 24-də Bayden Ukraynaya 1 milyard dollar ayrıldığını və ABŞ-ın Ukraynadan olan 100 min qaçqını qəbul etməyə hazır olduğunu açıqlayıb.
Rüfət
Alp.Az
