Pentaqon ABŞ Hərbi Dəniz Qüvvələrinin Oman körfəzində İrana məxsus tankerin neft daşımasının qarşısını alması ilə bağlı iddiaları rəsmən təkzib edib.
Alp.az xarici mediaya istinadən xəbər verir ki, ABŞ ordusu İran qüvvələrinin göyərtəyə daxil olmasını və Oman körfəzinin beynəlxalq sularında üzən ticarət gəmisini ələ keçirməsini aşkar edib. Bu barədə ABŞ Müdafiə Nazirliyinin sözçüsü bildirib.
Qeyd edək ki, bundan əvvəl İran mediası ABŞ hərbi gəmilərinin nefti başqa gəmiyə yönləndirmək üçün İran tankerini saxladığını yazmışdı. İslam İnqilabı Keşikçiləri Qvardiyasının (SEPAH) ABŞ hərbçilərinin neft tankerindəki yükü ələ keçirməsinə mane olan video görüntülər də yayılmışdı.
“Bu iddialar tamamilə yalan və aldadıcıdır. ABŞ Hərbi Dəniz Qüvvələri heç bir daşınan yükün qarşısını almaq üçün cəhd etməyib” – ABŞ Müdafiə Nazirliyinin sözçüsü Con Kirbi bildirib.
Onun sözlərinə görə, oktyabrın 24-də ABŞ Hərbi Dəniz Qüvvələri İran hərbi qüvvələrinin Oman körfəzinin beynəlxalq sularında üzən ticarət gəmisini ələ keçirməsi faktını aşkar edib.
Xatırladaq ki, İran tərəfi ABŞ hərbçilərinin hücum zamanı bir neçə döyüş helikopteri və gəmisindən istifadə etdiyini bildirib.konkret.az
